तौलिहवा(कपिलबस्तु), वैशाख ३० गते । दलित समाज विकास केन्द्र कपिलवस्तुद्वारा यशोधरा गाउँपालिकालाई विपद् खोज तथा उद्धारका लागि आवश्यक सामग्री हस्तान्तरण गरिएको छ । अष्ट्रेलिया एड, युनाइटेड मिसन टु नेपाल र दलित समाज विकास केन्द्रको सहयोगमा गाउँपालिकाको स्थानीय आपत्कालीन कार्य सञ्चालन केन्द्र बैदौलीलाई विभिन्न सामग्री प्रदान गरिएको हो ।
हस्तान्तरण गरिएका सामग्रीमा १० थान सेफ्टी ज्याकेट, पाँच थान लाइफ बोइरिङ रिङ, १० थान सर्चिङ लाइट, एक सेट फस्ट एड किट, गमबुट, १० थान सेफ्टी ग्लब्स, दुई थान फोल्डिङ स्ट्रेचर, पाँच थान बेल्चा, चार थान बाल्टिन, पाँच थान स्टिल मग, चार किलो डोरी, चार थान सेफ्टी कोण, पाँच थान कोदालो तथा १० थान फायर ब्ल्याङ्केट रहेका छन् ।
कार्यक्रममा पालिकाका स्थानीय आपत्कालीन सञ्चालन केन्द्रका फोकल व्यक्ति श्यामु यादवले विपद्को समयमा आवश्यक सामग्री अभाव हुने समस्या रहेको उल्लेख गर्दै प्राप्त सामग्रीले उद्धार तथा राहत कार्यलाई प्रभावकारी बनाउन सहयोग पुग्ने बताउनुभयो । उहाँले स्थानीय तहमा विपद् व्यवस्थापन क्षमतालाई सुदृढ बनाउन यस्ता सहयोग महत्वपूर्ण हुने धारणा राख्नुभयो ।
केन्द्रका खरिद समितिका संयोजक सुनिल चमारले गाउँपालिकामा बाढी, आगलागी तथा अन्य विपद्का घटनामा तत्काल परिचालन गर्न सकिने सामग्री उपलब्ध गराइएको बताउनुभयो । उहाँले समुदायस्तरमा विपद् पूर्वतयारी र उद्धार क्षमतालाई मजबुत बनाउन सामग्री हस्तान्तरण गरिएको जानकारी दिनुभयो ।
हस्तान्तरण कार्यक्रममा फिल्ड सुपरभाइजर लग्गन हरिजन, सहजकर्ता सुनिल चमार, लेखा अधिकृत सन्तोष लोहार लगायतको सहभागिता रहेको थियो ।
यशोधरा गाउँपालिकालाई विपद् खोज तथा उद्धार सामग्री
