कपिलवस्तु, वैशाख ३० गते । कपिलवस्तुको शुद्धोधन गाउँपालिका–१ स्थित श्री सनलाइट इङ्लिस बोर्डिङ स्कुल का विद्यार्थी आसीत भुसालले माध्यमिक शिक्षा परीक्षा (एसईई) मा ४ जीपीए प्राप्त गरेका छन् । उत्कृष्ट नतिजा हासिल गरेपछि विद्यालयले उनलाई ५१ हजार रुपैयाँ नगद पुरस्कार दिने घोषणा गरेको छ ।
विद्यालयका संस्थापक एसएन त्रिपाठी ले ४ जीपीए ल्याउने विद्यार्थीलाई ५१ हजार रुपैयाँ पुरस्कार दिने घोषणा यसअघि नै गरिएको र सोहीअनुसार आशित भुसाललाई पुरस्कार प्रदान गरिने जानकारी दिनुभयो ।
यस वर्ष विद्यालयबाट एसईई परीक्षामा सहभागी १७ जना विद्यार्थी सबै उत्तीर्ण भएका छन् । शतप्रतिशत नतिजासहित विद्यालय जिल्लामै प्रथम भएको दाबी विद्यालयले गरेको छ ।
यसैबीच, कपिलवस्तु जिल्लाबाट यस वर्षको एसईई परीक्षामा ११ जना विद्यार्थीले ४ जीपीए प्राप्त गरेका छन् । महेन्द्र माध्यमिक विद्यालयबाट ३ जना, कपिलवस्तु ज्ञानज्योति शिक्षा सदनबाट ३ जना, सनलाइट बोर्डिङ स्कुलबाट १ जना, लक्ष्मणघाट माध्यमिक विद्यालयबाट १ जना, हथौसा लिटिल स्टारबाट १ जना, बाडगंगा मावि लौगाई १ जना तथा बुद्ध पद्म माध्यमिक विद्यालय तौलिहवाबाट १ जना विद्यार्थीले ४ जीपीए ल्याएको सम्बन्धित विद्यालयहरूले जनाएका छन् ।
शिक्षा विकास तथा समन्वय इकाई कपिलवस्तुका निमित्त प्रमुख चोपलाल बेलवासेले पनि जिल्लामा ११ जना विद्यार्थीले ४ जीपीए प्राप्त गरेको जानकारी दिनुभयो ।
एसईईमा ४ जीपीए ल्याउने विद्यार्थीलाई ५१ हजार पुरस्कार
