किशोरीलाई आत्मनिर्भर बनाउन सीप

कपिलवस्तु, वैशाख ३० गते । “परिवर्तनका लागि बालबालिका, युवा र समुदाय परियोजना” अन्तर्गत डल, कुसन तथा बुके बनाउने २४ दिने निःशुल्क सिपमूलक तालिम सम्पन्न भएको छ । युनाइटेड मिसन टु नेपालको सहयोग, प्रगतिशील युवा समाजको समन्वय तथा दलित सामाजिक विकास केन्द्रको आयोजनामा उक्त तालिम सञ्चालन गरिएको हो ।
तालिम समापन कार्यक्रममा बोल्दै मायादेवी गाउँपालिका १ की वडा सदस्य कान्तिदेवी वर्माले सिकेको सीपलाई व्यवहारमा उतार्न सके मात्र तालिमको उद्देश्य सफल हुने बताउनुभयो । उहाँले तालिमबाट प्राप्त ज्ञानलाई आयआर्जनसँग जोड्न सहभागीलाई आग्रह गर्नुभयो ।
परियोजना अधिकृत जितेन्द्र चौधरीको अध्यक्षतामा सम्पन्न कार्यक्रममा तालिम लिएका सहभागीहरूले व्यवसाय सञ्चालन गर्न चाहे परियोजनाले आवश्यक सहयोग गर्ने जानकारी दिइएको थियो । सिकेको सीपले भविष्यमा आत्मनिर्भर बन्न सहयोग पुग्ने विश्वास व्यक्त गरिएको थियो ।
प्रशिक्षक गीता थापाले तालिमपछि सहभागी किशोरीहरूले आयआर्जन गर्न सक्ने बताउँदै आगामी दिनमा स्थानीय तहले सञ्चालन गर्ने यस्ता तालिममा प्रशिक्षक तथा परीक्षकको भूमिकासमेत निर्वाह गर्न सक्ने बताउनुभयो ।
सहभागी सुमन पत्थरकटले सिकेको तालिमलाई भविष्यमा आयआर्जनको माध्यम बनाउने बताउनुभयो । व्यापार व्यवसाय गरेर आफ्नै खर्च आफैँ व्यवस्थापन गर्न सकिने उहाँको भनाइ थियो । यस्तै सहभागी पुष्पलता दुबेले सीप सिकेपछि आफ्नै व्यवसाय सञ्चालन गर्न सकिने आत्मविश्वास बढेको बताउनुभयो ।
कार्यक्रममा प्रगतिशील युवा क्लबका सचिव बिन्देश्वरी यादवले सिकेको सीपलाई व्यवहारमा सदुपयोग गर्न सहभागीलाई आग्रह गर्नुभयो । तालिममा विभिन्न वडाका सात जना किशोरीहरूको सहभागिता रहेको थियो ।