कपिलवस्तु, वैशाख ३१ गते । गैरसरकारी संस्था महासङ्घ नेपाल को ३१औँ वार्षिक साधारण सभा तथा राष्ट्रिय नागरिक सम्मेलन २०८३ को अवसरमा गैरसरकारी संस्था महासङ्घ नेपाल कपिलवस्तु जिल्ला शाखा लुम्बिनी प्रदेशअन्तर्गत उत्कृष्ट जिल्लाका रूपमा छनोट भई राष्ट्रिय पुरस्कार तथा प्रमाणपत्रसहित सम्मानित भएको छ ।
जिल्ला शाखाले सामाजिक सेवा, नागरिक सहभागिता, समन्वय र संस्थागत सुदृढीकरणमा खेलेको सक्रिय भूमिकाको मूल्याङ्कन गर्दै उक्त सम्मान प्रदान गरिएको जनाइएको छ ।
सम्मान प्राप्तिपछि जिल्ला अध्यक्ष जय प्रकाश पाण्डेय ले यो उपलब्धि सम्पूर्ण जिल्ला शाखा परिवार, सदस्य संस्था तथा सहयोगीहरूको सामूहिक मेहनतको परिणाम भएको बताउनुभयो ।
उहाँले भन्नुभयो, “यो सम्मानले हाम्रो जिम्मेवारी अझ बढाएको छ । सामाजिक उत्तरदायित्व, नागरिक अधिकार र विकासका क्षेत्रमा अझ प्रभावकारी ढङ्गले काम गर्न प्रेरणा मिलेको छ ।”
उहाँले जिल्लाभित्र रहेका गैरसरकारी संस्थाबीच सहकार्य, पारदर्शिता र सामाजिक उत्तरदायित्वलाई थप मजबुत बनाउँदै लैजाने प्रतिबद्धता व्यक्त गर्नुभयो ।
सम्मान प्राप्त गरेपछि जिल्ला शाखा परिवारमा उत्साह थपिएको छ भने विभिन्न संघसंस्थाले कपिलवस्तु शाखालाई बधाई तथा शुभकामना व्यक्त गरेका छन् ।
