पर्सा, वैशाख ३१ गते । नेपाल प्रहरी का प्रहरी महानिरीक्षक दान बहादुर कार्की ले प्रहरी कार्यालयमा आउने सेवाग्राहीलाई सहज, सम्मानजनक र प्रभावकारी सेवा प्रदान गर्न प्रहरी कर्मचारीलाई निर्देशन दिनुभएको छ ।
आज जिल्ला प्रहरी कार्यालय पर्सा तथा इलाका प्रहरी कार्यालय सिम्रौनगढ परिसरमा नव–निर्मित “महिला, बालबालिका तथा ज्येष्ठ नागरिक सेवा केन्द्र” भवन उद्घाटन समारोहलाई सम्बोधन गर्दै उहाँले प्रहरीको दैलोमा आउने मानिस कुनै न कुनै पीडा, अन्याय वा समस्याबाट गुज्रिएको अवस्थामा आउने भएकाले उनीहरू निराश नभई सन्तुष्ट भएर फर्किनुपर्ने बताउनुभयो ।
महानिरीक्षक कार्कीले नेपाल प्रहरी अब केवल परिवर्तनको चरणमा नभई व्यवहारिक रूपान्तरणको दिशामा अघि बढिरहेको स्पष्ट पार्दै सेवा प्रवाहमा व्यवहार, आचरण र सेवाशैलीमा सुधार अपरिहार्य रहेको धारणा व्यक्त गर्नुभयो ।
उहाँले भन्नुभयो, “हामी नागरिकका लागि काम गरिरहेका छौँ भन्ने कुरा व्यवहारमै प्रमाणित हुनुपर्छ, नत्र भौतिक संरचनाको मात्रै कुनै अर्थ रहँदैन ।”
महिला, बालबालिका तथा ज्येष्ठ नागरिक समाजका संवेदनशील वर्ग भएकाले उनीहरूको सुरक्षा, सहायता र न्याय सुनिश्चित गर्नु नेपाल प्रहरीको प्राथमिक दायित्व भएको उहाँको भनाइ थियो । नव–निर्मित सेवा केन्द्रहरूले पीडित तथा सेवाग्राहीलाई सुरक्षित, सहज र सम्मानजनक वातावरणमा सेवा प्राप्त गर्न सहयोग पुग्ने विश्वास व्यक्त गर्नुभयो ।
उहाँले सीमित स्रोतसाधन र कठिन परिस्थितिका बीच प्रहरी कर्मचारी निरन्तर सेवामा खटिएको उल्लेख गर्दै प्रहरीको कार्य वातावरण सुधारलाई पनि प्राथमिकतामा राख्नुपर्ने बताउनुभयो । “४० डिग्रीको गर्मीमा सडकमा उभिने प्रहरीलाई पनि घामपानीबाट जोगिने ओत आवश्यक हुन्छ,” उहाँले भन्नुभयो ।
महानिरीक्षक कार्कीले प्रहरी कार्यालय, ब्यारेक तथा सेवा केन्द्रहरूको अवस्था अझै कतिपय स्थानमा चुनौतीपूर्ण रहेको उल्लेख गर्दै दातृ निकाय, स्थानीय तह तथा समुदायबाट प्राप्त सहयोगप्रति आभार व्यक्त गर्नुभयो ।
उहाँले UNOPS ले नेपाल प्रहरीको पूर्वाधार विकास, क्षमता अभिवृद्धि तथा सेवा सुधारमा महत्वपूर्ण योगदान पुर्याएको बताउँदै हालसम्म ४४ वटा सेवा केन्द्र भवन निर्माण सम्पन्न भइसकेको र थप आठ वटा निर्माणाधीन रहेको जानकारी दिनुभयो ।
सेवा प्रवाहलाई प्रविधिमैत्री बनाउने क्रममा Nepal Police App मार्फत घरबाटै उजुरी तथा गुनासो दर्ता गर्न सकिने र त्यसको प्रगति अनुगमन गर्न सकिने व्यवस्था विस्तार भइरहेको उहाँले बताउनुभयो । साथै आपतकालीन अवस्थामा जीपीएस लोकेसनसहित सहायता माग गर्न सकिने ‘प्यानिक मोड’ प्रणाली विकास भइरहेको जानकारी दिनुभयो ।
उहाँले न्यायिक तथा सामाजिक विवादमा अनावश्यक व्यक्तिको हस्तक्षेप बढ्दै गएको उल्लेख गर्दै यसले न्याय प्रक्रियामा असर पार्ने, आर्थिक भार बढाउने तथा कमजोर वर्ग अन्यायमा पर्ने जोखिम बढाएको बताउनुभयो । पीडितको गोपनीयता, मर्यादा र सुरक्षालाई केन्द्रमा राखेर मात्र समाधान प्रक्रिया अघि बढाउनुपर्नेमा उहाँले जोड दिनुभयो ।
महानिरीक्षक कार्कीले सेवाग्राहीलाई अनावश्यक दुःख दिने प्रवृत्ति अन्त्य गर्न निर्देशन दिँदै कानुनअनुसार सेवा दिन नसकिने अवस्थामा स्पष्ट जानकारीसहित सम्बन्धित निकायमा सहजीकरण गर्न प्रहरी कर्मचारीलाई आग्रह गर्नुभयो ।
उहाँले उद्घाटन गरिएको भवनलाई केवल भौतिक संरचना नभई प्रहरी–नागरिक विश्वास, सहकार्य र भरोसाको प्रतीकका रूपमा विकास गर्नुपर्ने बताउनुभयो ।
कार्यक्रममा विभिन्न सरकारी निकाय, सुरक्षा निकाय, स्थानीय तह, राजनीतिक दल, उद्योगी व्यवसायी, सामाजिक संघसंस्था तथा सञ्चारकर्मीहरूको सहभागिता रहेको थियो ।
