कपिलबस्तु, जेठ १ गते । जिल्लाको मायादेवी गाउँपालिकामा सञ्चालित ‘सुधारिएको खाद्य प्रणाली परियोजना’ अन्तर्गत भएका गतिविधिको पालिका स्तरीय अनुगमन गरिएको छ । वि.एम.जेड र डब्लु.एच.एच.को आर्थिक तथा प्राविधिक सहयोगमा फरवार्ड नेपाल र कालिका स्वालम्बन सामाजिक केन्द्रद्वारा सञ्चालित परियोजनाअन्तर्गत भएका कार्यक्रमको संयुक्त अनुगमन गरिएको हो ।
पालिका स्तरीय परियोजना सल्लाहकार समितिको सहभागितामा गरिएको अनुगमनका क्रममा वडा नं. १ पिचुर्खीमा रहेको पोषण बगैचा, वडा नं. २ अभिराममा निर्माण गरिएको ह्यान्ड पम्प चौतारो, वडा नं. ४ मा उद्यमशीलता तालिमपछि सञ्चालनमा आएको “जे के फास्ट फुड” तथा वडा नं. ७ बनकसिहामा सञ्चालन भइरहेको मासु पसल व्यवसायको अवलोकन गरिएको थियो ।
अनुगमनपछि बोल्दै मायादेवी गाउँपालिकाका अध्यक्ष वालिउँद्दिन मुसलमानले परियोजनाले ग्रामीण समुदायको जीवनस्तर सुधारमा महत्वपूर्ण योगदान पु¥याएको बताउनुभयो । उहाँले “परियोजनाले स्थानीय नागरिकलाई स्वरोजगारसँग जोड्नुका साथै पोषण, सरसफाइ र आयआर्जनका क्षेत्रमा सकारात्मक परिवर्तन ल्याएको छ,” भन्नुभयो। अध्यक्ष मुसलमानले यस्ता कार्यक्रमलाई आगामी दिनमा पनि निरन्तरता दिन गाउँपालिकाले आवश्यक सहकार्य गर्ने प्रतिबद्धता व्यक्त गर्नुभयो ।
त्यसैगरी मायादेवी गाउँपालिकाका प्रमुख प्रशासकीय अधिकृत नरेन्द्र यादवले परियोजनाले समुदायमा व्यवहारिक र दिगो प्रभाव पारेको बताउनुभयो । उहाँले “स्थानीय आवश्यकतालाई आधार बनाएर सञ्चालन गरिएका कार्यक्रम प्रभावकारी देखिएका छन् । विशेषगरी महिलाहरू र विपन्न समुदायको आर्थिक सशक्तीकरणमा परियोजनाले महत्वपूर्ण भूमिका खेलेको छ,” भन्नुभयो ।
अनुगमन कार्यक्रममा कालिका स्वावलम्बन सामाजिक केन्द्रका अध्यक्ष मन्दिप सिंह, कोषाध्यक्ष प्रविण कुमार श्रीवास्तव, मायादेवी गाँउपालिकाका विभिन्न शाखाका प्रमुख तथा प्रतिनिधिहरूको सहभागिता रहेको थियो । परियोजनाका नागरिक समाज परिचालन तथा वकालत अधिकृत अशोकचन्द्र लम्सालले परियोजनाको प्रगति तथा उपलब्धिबारे जानकारी गराउनुभएको थियो ।
सुधारिएको खाद्य प्रणाली परियोजनाबाट समुदायमा सकारात्मक परिवर्तन
