कपिलवस्तु, जेठ १३ गते । कपिलवस्तुको जगदिशपुरस्थित डेरी उद्योग अनियमित विद्युत् आपूर्तिका कारण संकटमा परेको छ । न्यून भोल्टेज र पटक–पटक विद्युत् अवरुद्ध हुँदा दैनिक दूध तथा दुग्धजन्य पदार्थ उत्पादन प्रभावित बनेपछि किसानहरूले जिल्ला प्रशासन कार्यालय पुगेर समस्या समाधानको माग गरेका छन् ।
साना किसान कृषि सहकारी संस्था लिमिटेड निग्लिहवा द्वारा सञ्चालित डेरी उद्योगमा विद्युत् समस्याका कारण उत्पादन प्रभावित भएको हो । २०७६ सालदेखि सञ्चालनमा रहेको उक्त उद्योगले दैनिक करिब तीन हजार लिटर दूध संकलन गर्दै आएको छ । झण्डै ११ सय किसान आबद्ध रहेको डेरीमा दूध, दही, पनिर तथा आइसक्रिम उत्पादन हुँदै आएको छ ।
सहकारीका अनुसार सामुदायिक विद्युत् वितरण संस्था जगदीशपुरबाट पर्याप्त भोल्टेज नआउँदा उद्योग सञ्चालनमा कठिनाइ भएको छ । उद्योगमा १३० देखि १४५ भोल्टसम्म मात्र विद्युत् आउने तथा पटक–पटक लाइन अवरुद्ध हुने समस्याले मेसिन सञ्चालन प्रभावित बनेको जनाइएको छ । सोमबार मात्रै तीन हजार पाँच सय लिटर दूध फाल्नुपरेको डेरी व्यवस्थापनले जनाएको छ ।
सहकारीका प्रबन्धक बसन्त मुराउ ले न्यून भोल्टेजका कारण मेसिन सञ्चालन गर्न नसकिएको बताउनुभयो । डिजेलबाट जेनेरेटर सञ्चालन गर्दा खर्च अत्यधिक बढेको उहाँको भनाइ छ । समस्या समाधान नभए उद्योग बन्द गर्नुपर्ने अवस्था आउन सक्ने उहाँले बताउनुभयो ।
२०७९ सालदेखि पटक–पटक लिखित आग्रह गर्दा पनि समस्या समाधान नभएको भन्दै ५० भन्दा बढी किसान जिल्ला प्रशासन कार्यालय पुगेका हुन् । किसानहरूले स्थानीय, प्रदेश तथा संघीय सरकारसँग तत्काल समस्या समाधान गर्न माग गरेका छन् । माग सम्बोधन नभए आन्दोलनमा उत्रिने चेतावनीसमेत दिएका छन् ।
