निर्वाचन आयोगले नेपाली कांग्रेसबाट निर्वाचित गुल्मीका दुई जना वडाध्यक्ष पदमुक्त भएको जनाएको छ। आयोगले बिहीबार सूचना जारी गर्दै दल परित्याग गरेका कारण उनीहरूको पद रिक्त भएको जानकारी दिएको हो।
पदमुक्त हुनेमा रविन्द्र केसी र पदमबहादुर बिष्ट रहेका छन्। उनीहरू २०७९ सालको स्थानीय तह निर्वाचनमा नेपाली कांग्रेसका तर्फबाट निर्वाचित भएका थिए।
आयोगका अनुसार राजनीतिक दल सम्बन्धी ऐन, २०७३ र नियमावली, २०७४ बमोजिम सम्बन्धित दलको केन्द्रीय समितिको निर्णयका आधारमा दुवै पद रिक्त भएको हो। नेपाली कांग्रेसले उनीहरू अन्य दलमा प्रवेश गरेको निर्णयसहितको पत्र आयोगलाई पठाएपछि पदमुक्त गरिएको जनाएको छ।
दुवै वडाध्यक्ष गत फागुन २१ गते भएको प्रतिनिधिसभा निर्वाचनको समयमा राष्ट्रिय स्वतन्त्र पार्टी मा प्रवेश गरेका थिए।
