वर्षौंदेखि खानेपानीबाट वञ्चित कपिलवस्तु नगरपालिका वडा नं. १ राजपुरमा रहेका ३९ अति विपन्न परिवारलाई निःशुल्क खानेपानीको धारा जडान गरिएको छ। कपिलवस्तु नगरपालिका वडा नं. १ को ४ लाख लगानीमा राजपुरका दलित तथा अति विपन्न बस्तीमा खानेपानी धारा जडान गरिएको हो।
सय घर रहेको राजपुर गाउँमा वर्षौँअघि जडान गरिएको एउटै सार्वजनिक धाराबाट गाउँवासीले पानीको जोहो गर्दै आएका थिए। हुनेखाने केही परिवारले भने आफ्नै खर्चमा धारा जडान गरेका छन्। राजपुर गाउँमा अधिकांश दलित र अति विपन्न परिवार छन्।
वडा अध्यक्ष जाहिद खाँले वर्षौंदेखिको खानेपानी समस्यालाई मध्यनजर गर्दै निःशुल्क खानेपानी धारा जडान गरिएको बताए। ३९ घरपरिवारमा खानेपानी धारा जडान गरी स्वच्छ तथा सहज खानेपानीको पहुँच सुनिश्चित गरिएको उनले बताए। चार वर्षमा आफ्नो वडामा गरेका काममध्ये यो नै उत्कृष्ट काम रहेको उनले बताए।
“स्वच्छ खानेपानी खानपाउनु नागरिकको अधिकार हो, त्यसैका लागि राजपुरमा धारा जडान गरिएको हो,” उनले भने।
अब न्यूनतम १ सय १० रुपैयाँ मासिक तिरेर १० हजार लिटर पानी उपभोग गर्न पाउनेछन्। आफ्नो घरमै धारा जडान भएपछि हर्षित भएकी किस्तावती पासीले अब पानीको समस्या हल भएको बताइन्। गाउँमै रहेको एउटै सार्वजनिक धाराबाट पानीको व्यवस्था गर्न धेरै कठिन भएको स्मरण गर्दै उनले अब परिवारलाई धेरै सहज भएको बताइन्। स्वच्छ पानी पिउन, नुहाउन, भाँडा माझ्न र कपडा धुन अब धेरै सहज भएको उनले बताइन्।
गाउँकै विपन्न चिन्का पासीले निःशुल्क धारा जडानले पानीको ठूलो समस्या समाधान भएको बताए। “गाउँमा वर्षौंदेखि पानीको ठूलो समस्या थियो, अहिले वडाले समाधान गरेको छ,” उनले भने।
वडा अध्यक्ष खाँले विपन्नताका कारण खानेपानी धारा जडान गर्न नसकेका विपन्न परिवारलाई आगामी दिनमा समेत निःशुल्क धारा जडान गर्ने कार्य जारी राख्ने बताए। उनले जनताको आधारभूत आवश्यकतालाई प्राथमिकतामा राख्दै वडा कार्यालय सधैं जनसेवामा प्रतिबद्ध रहेको बताए।
