कपिलवस्तु, जेठ २४ गते । नेपाली कांग्रेस कपिलवस्तुका जिल्ला सह–सचिव वाजीह अरशदले पार्टीको साधारण सदस्यता तथा सह सचिव पदबाट राजीनामा दिएका छन्। आज जारी गरिएको राजीनामा पत्रमार्फत अरशदले पार्टी नेतृत्वको कार्यशैलीप्रति असहमति जनाउँदै पद तथा साधारण सदस्यता त्याग गरेको घोषणा गरेका हुन्।
राजीनामापत्रमा उनले २०५५ सालदेखि नेपाल विद्यार्थी संघमार्फत राजनीतिक यात्रा सुरु गरेको उल्लेख गरेका छन्। कपिलवस्तु बहुमुखी क्याम्पसको स्वतन्त्र विद्यार्थी युनियन निर्वाचनबाट सदस्यमा निर्वाचित हुँदै राजनीतिक जीवन प्रारम्भ गरेका अरशद २०६० सालमा स्ववियु सभापतिमा निर्वाचित भएका थिए। जनआन्दोलन–२०६२ का क्रममा गिरफ्तार भएको तथा त्यसपश्चात २०६३ सालमा नेविसंघ कपिलवस्तुको जिल्ला सभापतिमा निर्वाचित भई संगठन निर्माणमा सक्रिय भूमिका निर्वाह गरेको उनले बताएका छन्।
हाल नेपाली कांग्रेस कपिलवस्तुको जिल्ला सह सचिवको जिम्मेवारीमा रहेका अरशदले पार्टीभित्र देखिएको अनियमितता तथा पुराना कार्यकर्तालाई विस्थापित गर्ने प्रवृत्तिविरुद्ध आफूले निरन्तर आवाज उठाउँदै आएको दाबी गरेका छन्।
उनले जिल्ला नेतृत्वको पृष्ठभूमि “बागी र विद्रोही” रहेको उल्लेख गर्दै पार्टीका इमानदार तथा पुराना कार्यकर्ताको सम्मान र संरक्षण गर्न आफू असफल भएको महसुस गरेको बताएका छन्। पार्टी हितका विषय उठाउँदा नेतृत्वको घेराबन्दीमा पर्दै आएको भन्दै उनले जिल्लाको नेतृत्वको कार्यशैलीसँग आफ्नो गम्भीर असहमति रहेको जनाएका छन्।
राजीनामापत्रमा अरशदले आगामी दिनमा नेपाली कांग्रेसका संस्थापक नेता महामानव बिपी कोइरालाले देखाएको प्रजातान्त्रिक मूल्य, मान्यता र आदर्शप्रति प्रतिबद्ध रहँदै स्वतन्त्र रूपमा देश र जनताको सेवामा समर्पित रहने उल्लेख गरेका छन्।
