कपिलवस्तु, साउन ३ गते । जिल्ला प्रहरी कार्यालय कपिलवस्तुले सञ्चालन गरेको लागु औषध दुव्र्यसन नियन्त्रण तथा परीक्षण अभियानअन्तर्गत ६ पटक गरिएको चेकजाँचमा १५ जना सवारी चालक तथा सहचालकमा लागु औषध सेवन गरेको पुष्टि भएको छ ।
गत आर्थिक वर्षमा जिल्लाका विभिन्न स्थानमा सञ्चालन गरिएको अभियानका क्रममा ६ पटक किटमार्फत परीक्षण गरिएको थियो । परीक्षणमा १५० जना चालक र १ जना सहचालक गरी १५१ जनाको लागुऔषध परीक्षण गरिएको जिल्ला ट्राफिक प्रहरी कार्यालय कपिलवस्तुले जनाएको छ ।
परीक्षणको क्रममा १४ जना चालक र एकजना सहचालकमा लागु औषध सेवन गरेको पुष्टि भएको छ । पक्राउ परेकामध्ये एक जना विद्यालय बसका चालक रहेको जिल्ला ट्राफिक प्रहरी कार्यालय कपिलवस्तुका प्रमुख प्रहरी निरीक्षक राजन ढकालले जानकारी दिनुभयो ।
अभियानअन्तर्गत पिपरा, तौलिहवा, पकडी र चन्द्रौटा लगायत स्थानमा नियमित रूपमा चेकजाँच गरिएको थियो । साउन महिनामा पिपरामा गरिएको परीक्षणको क्रममा एकै पटक ७ जना चालकमा लागुऔषध सेवन (लापसे) पोजेटिभ देखिएको प्रहरीको तथ्याङ्कमा उल्लेख छ ।
कृष्णनगर ट्राफिक प्रहरी पोस्टका प्रहरी नायव निरीक्षक नीरज गौतमका अनुसार लागु औषध सेवन गरेर सवारी चलाउने चालकलाई प्रचलित कानुनबमोजिम कारबाही गरिँदै आएको छ । सडक दुर्घटना न्यूनीकरण तथा सुरक्षित यातायात व्यवस्थापनका लागि नियमित रूपमा लागुऔषध परीक्षण अभियान सञ्चालन गरिने उहाँले बताउनुभयो ।
