कपिलबस्तुमा ३१ औँ राष्ट्रिय बालसाहित्य सम्मेलन आयोजना हुने

तौलिहवा(कपिलबस्तु), साउन ३ गते । प्राचीन कपिलबस्तुमा ३१ औं राष्ट्रिय बालसाहित्य सम्मेलन आयोजना हुने भएको छ । भगवान् गौतम बुद्धको बाल्यकालसँग जोडिएको ऐतिहासिक तिलौराकोटमा आगामी मंसिर ११ र १२ गते उक्त सम्मेलन हुने भएको छ । सम्मेलनको तयारीबारे जानकारी दिन आयोजित पत्रकार सम्मेलनमा स्थानीय मूल आयोजक समितिले सम्मेलनलाई कपिलवस्तुको प्रतिष्ठा र गौरवसँग जोडिएको ऐतिहासिक अवसरका रूपमा सफल बनाउन सबै पक्षको सहयोग आवश्यक रहेको जनाएको छ ।
भृकुटी सामुदायिक सिकाइ केन्द्र, बुद्धभूमि नगरपालिका ४ को नेतृत्वमा गठित स्थानीय मूल आयोजक समितिका संयोजक मिनराज बेलबासेले सम्मेलनले बालसाहित्यको विकाससँगै कपिलवस्तुको ऐतिहासिक, पुरातत्विक, सांस्कृतिक तथा पर्यटकीय महत्वलाई राष्ट्रिय तथा अन्तर्राष्ट्रिय स्तरमा प्रवद्र्धन गर्ने विश्वास व्यक्त गर्नुभयो ।
नेपाल बालसाहित्य समाजद्वारा जारी प्रेस वक्तव्यअनुसार वि.सं. २०४४ सालदेखि निरन्तर आयोजना हुँदै आएको राष्ट्रिय बालसाहित्य सम्मेलन यस वर्ष बुद्धकालीन राजधानी तिलौराकोटमा आयोजना हुन लागेको हो । सम्मेलनमा नेपालका विभिन्न जिल्लाका साथै एसियाका सात देशबाट करिब १५ जना साहित्यकार तथा कलाकार, देशभरका ५० जना विशिष्ट स्रष्टा र कपिलवस्तुका करिब ५०० विद्यार्थीको सहभागिता रहने अपेक्षा गरिएको छ ।
सम्मेलनमा कक्षा ६ देखि १२ सम्मका विद्यार्थीलाई लक्षित गरी बालकथा, कविता, निबन्ध, समीक्षा लेखन, चित्रकला, हस्तलेखन, अभिनय तथा नृत्य प्रशिक्षण कार्यशाला सञ्चालन गरिनेछ । साथै पुस्तक प्रदर्शनी, नयाँ पुस्तक लोकार्पण, प्रभातफेरी, सांस्कृतिक कार्यक्रम, बालसाहित्य सम्बन्धी अन्तरक्रिया, तिलौराकोट दरबार अवलोकन तथा समापन समारोहमा पुरस्कार वितरण र ‘कपिलवस्तु घोषणापत्र’ जारी गरिने कार्यक्रम रहेको छ ।
पत्रकार सम्मेलनमा स्वागत मन्तव्य राख्दै पदम परवासीले सम्मेलनले बालबालिकामा पठन संस्कार, सिर्जनशीलता र साहित्यप्रतिको रुचि अभिवृद्धि गर्ने विश्वास व्यक्त गर्नुभयो ।
नव साहित्य समाज कपिलवस्तुका अध्यक्ष पशुपति मणि त्रिपाठीले सम्मेलन कपिलवस्तुको साहित्यिक इतिहासमा महत्वपूर्ण उपलब्धि हुने बताउँदै यसको सफलताका लागि सबैको साझा प्रयास आवश्यक रहेको उल्लेख गर्नुभयो ।
साहित्यकार हरिराज शर्माले सम्मेलनलाई कपिलवस्तुको प्रतिष्ठा र पहिचानसँग जोडिएको कार्यक्रमका रूपमा लिनुपर्ने बताउँदै यसले जिल्लाको साहित्य, इतिहास र पर्यटन प्रवद्र्धनमा कोसेढुङ्गा सावित हुने विश्वास व्यक्त गर्नुभयो ।
संयोजक बेलबासेले बालबालिकाको क्षमता र प्रतिभाको पहिचान गरी उनीहरूलाई सिर्जनशील वातावरण उपलब्ध गराउनु सम्मेलनको मुख्य उद्देश्य रहेको बताउनुभयो । उहाँका अनुसार सम्मेलन सम्पन्न गर्न करिब १२ लाख रुपैयाँ खर्च हुने अनुमान गरिएको छ, जसमा सात लाख रुपैयाँ नेपाल बालसाहित्य समाज केन्द्र र पाँच लाख रुपैयाँ स्थानीय आयोजकले व्यवस्थापन गर्नेछन् ।
कार्यक्रममा सहत्यिकार एवम् विभिन्न मिडियका प्रमुख एवम् प्रतिनिधिहरुको सहभागिता रहेको थियो ।