तनहुँको व्यास नगरपालिका-७ कलेस्ती पुलमा भएको बस दुर्घटनामा घाइते हुनेहरूको संख्या १७ पुगेको छ। पछिल्लो विवरण अनुसार थप दुई जना घाइते थपिएका हुन्। दुर्घटनामा परी घाइते भएका सबै १७ जनाको दमौलीस्थित रत्नहरी अस्पतालमा उपचार भइरहेको छ।
थपिने घाइतेहरूमा तनहुँ व्यास-६ की ४५ वर्षीया लक्ष्मी शाही र लमजुङ मध्यनेपाल नगरपालिका-९ का ३० वर्षीय श्रीमान बुढा रहेका छन्। उनीहरू दुवैको अवस्था सामान्य रहेको र बायाँ खुट्टा तथा बायाँ हातमा सामान्य चोट लागेको प्रहरीले जनाएको छ।
शनिबार दिउँसो दमौली–भोर्लेटार सडक खण्डमा कलेस्तीबाट दमौलीतर्फ जाँदै गरेको ग १ ख ६४६५ नम्बरको बस अनिरन्तरित भई पुलमा ठोक्किँदा उक्त दुर्घटना भएको थियो।
दुर्घटनामा बसका चालक व्यास-२ का २६ वर्षीय शम्शेर परियार गम्भीर घाइते भएका छन् भने अन्य १६ जना यात्रुहरूको अवस्था सामान्य छ।
