तौलिहवा (कपिलबस्तु), भदौ १२ गते । विनाशकारी भोटेकोशी बाढीमा परी ज्यान गुमाएकाहरूको सम्झनामा भगवान् बुद्धको पवित्र जन्मस्थल लुम्बिनीस्थित मायादेवी मन्दिर परिसरमा विशेष प्रार्थना गरिएको छ ।
पावन पूर्णिमाको अवसरमा आयोजित प्रार्थनामा बाढीमा परी ज्यान गुमाएकाहरूप्रति श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना व्यक्त गरिएको हो ।
साथै, बेपत्ता भएकाहरू सकुशल फेला परून्, घाइतेहरूले शीघ्र स्वास्थ्यलाभ गरून् र प्रभावित परिवारले दुःखको यस घडीमा आवश्यक सहयोग र साथ प्राप्त गरून् भन्ने कामना गरिएको छ ।
भिक्षु–भिक्षुणी, गुरु तथा लुम्बिनी विकास कोषका कर्मचारीहरूको उपस्थितिमा शान्ति, करुणा, मैत्रीभाव र मानवताको कामना सहित प्रार्थना गरिएको लुम्बिनी विकास कोषका निमित्त सदस्य सचिव ज्ञानिन राईले बताउनुभयो ।
प्राकृतिक विपद्ले निम्त्याएको दुःखद परिस्थितिमा पीडित परिवारप्रति समवेदना व्यक्त गर्दै भगवान् बुद्धको करुणा, मैत्री र मानवताको सन्देशले पीडित मनहरूमा शान्ति र आशा प्रदान गरोस् भन्ने प्रार्थना गरिएको उहाँले बताउनुभयो ।
निमित्त सदस्य सचिव राईले विपद्को घडीमा पीडित परिवारलाई आवश्यक सहयोग, साथ र हौसला प्रदान गर्नु सबैको दायित्व भएको बताउँदै बेपत्ता भएकाहरूको सकुशल उद्धार र प्रभावित परिवारको शीघ्र पुनःस्थापनाको कामना गर्नुभयो ।
प्रार्थनामा बाढीबाट प्रभावित सम्पूर्ण परिवारमा साहस र धैर्य प्राप्त होस् तथा विपद्को पीडाबाट मुक्त भई सामान्य जीवनमा फर्कन सकून् भन्ने कामना गरिएको थियो ।
