गुल्मी, भदौ १७ गते। गुल्मीको सदरमुकाम तम्घासस्थित नेपाल नेत्रज्योति संघ जिल्ला आँखा उपचार केन्द्रले एक वर्षमा ४१ हजारभन्दा बढी नागरिकको आँखा उपचार गरेको छ । गत आर्थिक वर्ष २०८२–०८३ मा यस संस्थाले ४१ हजार ९३४ जनाको आँखा जाँच गरेको बताइएको हो । आँखा उपचार सेवालाई नागरिकको पहुँचमा पु¥याउन यस शाखाले संघीय सरकार, प्रदेश सरकार र स्थानीय सरकारसँग सहकार्य गर्दै आएको छ ।
नेपाल नेत्रज्योति संघ जिल्ला शाखाका अनुसार गतवर्ष जिल्ला आँखा उपचार तथा शल्यक्रिया केन्द्र र यस जिल्लामा रहेका विभिन्न छ आँखा उपचार केन्द्रबाट २३ हजार ६७८ र बाह्य विभिन्न शिविरबाट पाँच हजार ५०७ जनाको आँखा जाँच गरिएको छ । आँखा उपचार केन्द्रहरुबाट एक हजार २७८ जनालाई कान उपचार सेवा समेत प्रवाह गरिएको थियो । त्यसैगरी जिल्लाका विभिन्न विद्यालयमा पुगेर १२ हजार ७४९ जना विद्यार्थीको आँखा जाँच गरिएको हो ।
गतवर्ष विद्यालय विद्यार्थी आँखा जाँच कार्यक्रमअन्तर्गत २९१ जना विद्यार्थीलाई निःशुल्क चस्मा वितरण गरिएको छ । एक वर्षमा ६१९ जनाको मेजर अप्रेशन र २० जनाको आँखाको माइनर अप्रेशन गरिएको हो । गतवर्ष सदरमुकाम बाहिर आठ वटा निःशुल्क शल्यक्रिया शिविर सञ्चालन गरिएको छ । सेभा फाउन्डेशन, डाक नेपाल लगायतका अन्तर्राष्ट्रिय दातृ निकायको सहयोगमा नेपाल नेत्रज्योति संघको केन्द्रीय र प्रदेश समिति एवम् लुम्बिनी नेत्रविज्ञान अध्ययन संस्थान तथा अनुसन्धान केन्द्रको मार्गनिर्देशन बमोजिम गुणस्तरीय सेवा प्रदान गरिएको गरिएको नेपाल नेत्र ज्योति संघ गुल्मीका सभापति अखिलेश्वरप्रसाद पाण्डेयले बताउनुभयो ।
नेपाल नेत्रज्योति संघ जिल्ला आँखा उपचार केन्द्रले नागरिकको आँखाको मोतियाबिन्दुको निःशुल्क शल्यक्रियाका लागि दश स्थानीय तहसँग सम्झौता गरेको छ । गतवर्ष सम्झौता गरेका नौ स्थानीय तहका २४३ जना नागरिकले सेवा लिनुभएको छ । दुई नगरपालिका र दश गाउँपालिकामध्ये रेसुङ्गा नगरपालिकाका ६७ जना, इस्मा गाउँपालिकाका ४० जना, गुल्मीदरबार गाउँपालिकाका ५१ जना, छत्रकोट गाउँपालिकाका ३७ जना, रुरुक्षेत्र गाउँपालिकाका १३ जना, धुर्कोट गाउँपालिकाका २५ जना र सत्यवती गाउँपालिकाका पाँच जना, चन्द्रकोट गाउँपालिकाका चार जना र मदाने गाउँपालिकाका एक जनाले शल्यक्रियाका सेवा लिनुभएको छ ।
यस संस्थमा स्वास्थ्य बिमा सेवा लागू भएको छ । स्वास्थ्य बिमा गरेका सेवाग्राहीले बिमा वोर्डको निमयअनुसार २० प्रतिशत भुक्तानी स्वयम् आफैले गर्ने गरेको केन्द्रले जनाएको छ । लक्षित समूहले भुक्तानी गर्नुपर्दैन । निःशुल्क शल्यक्रियाका लागि सम्झौता गरेका पालिकाहरुले स्वास्थ्य बिमा गरेका नागरिकहरुको २० प्रतिशत भुक्तानी पालिकाले नै बेहोरेको छ । २०४७ सालमा स्थापना भएको यस शाखाले छिमेकी जिल्ला बागलुङ र अर्घाखाँचीका आँखाका बिरामीलाई समेत सेवा प्रदान गर्दै आएको छ । यहाँबाट नाम दर्ता, ओपिडी सेवा, औषधी, इमर्जेन्सी सेवा र शल्यक्रिया सेवा लिन सकिन्छ ।
जिल्ला आँखा उपचार केन्द्रमा गुल्मी जिल्लाको जुनसुकै स्वास्थ्य संस्थामा प्रथम सेवा बिन्दु मानेका नागरिकले रेफर लिएर सेवा प्राप्त गर्न सक्छन् । नेत्रज्योति संघद्वारा सञ्चालित आँखा उपचार केन्द्रले विभिन्न निःशुल्क आँखा परीक्षण शिविर सञ्चालन गरेको नेपाल नेत्र ज्योति संघ गुल्मीका सचिव पदमप्रसाद पाण्डेले बताउनुभयो । नेपाल नेत्रज्योति संघ जिल्ला शाखाअन्तर्गत जिल्ला आँखा उपचार तथा शल्यक्रिया केन्द्रसहित सात वटा आँखा उपचार केन्द्र सञ्चालित छन् । जसमा कालिगण्डकी, रिडी, वामी, शान्तिपुर, सिमलटारी र पुर्कोटदहमा आँखा उपचार केन्द्र सञ्चालन रहेका छन् ।
नेपाल नेत्रज्योति संघ जिल्ला शाखाअन्तर्गत जिल्ला आँखा उपचार तथा शल्यक्रिया केन्द्रसहित कालिगण्डकी, रिडी, वामी, शान्तिपुर, सिमलटारी र पुर्कोटदहमा गरी सात वटा आँखा उपचार केन्द्र सञ्चालनमा छन् ।
नेपाल नेत्रज्योति संघ गुल्मीका सचिव पदमप्रसाद पाण्डेका अनुसार जिल्लाका विभिन्न स्थानमा निःशुल्क आँखा परीक्षण शिविर सञ्चालन गरी नागरिकको पहुँचमा आँखा उपचार सेवा पुर्याउने काम भइरहेको छ ।
