कपिलवस्तु । बाणगंगा नगरपालिका–४ गजेहडास्थित चार नम्बर–तौलिहवा सडकखण्डमा स्कुटर र ई–स्कुटर ठोक्किँदा एक जनाको मृत्यु भएको छ भने दुई जना घाइते भएका छन् ।
बुधबार अपराह्न करिब ४ बजे गजेहडाबाट सिउटीतर्फ जाँदै गरेको लु.प्र.०१–०१२ प १२६५ नम्बरको स्कुटरले सोही दिशातर्फ जाँदै गरेको लु.३ त ७३८३ नम्बरको ट्र्याक्टरलाई ओभरट्याक गर्ने क्रममा विपरीत दिशाबाट आउँदै गरेको लु.प्र.०१–००९ प २४०२ नम्बरको ई–स्कुटरलाई ठक्कर दिँदा दुर्घटना भएको हो ।
दुर्घटनामा स्कुटर चालक रुपन्देहीको कञ्चन गाउँपालिका–५ भैसाही निवासी २७ वर्षीय रुद्रनारायण थारूको मृत्यु भएको जिल्ला ट्राफिक प्रहरी कार्यालय कपिलवस्तुले जनाएको छ । गम्भीर घाइते भएका थारूलाई उपचारका लागि पिपरा अस्पताल लगिएकोमा चिकित्सकले अपराह्न ४ः५० बजे मृत घोषणा गरेका थिए । मृतकको पहिचान उनका दाजु र आमाले गरेका थिए ।
दुर्घटनामा ट्र्याक्टर चालक बाणगंगा नगरपालिका–११ मैरी निवासी ३५ वर्षीय बमबहादुर चौधरी र ई–स्कुटर चालक बाणगंगा नगरपालिका–८ बोडगाउँ निवासी ३५ वर्षीया रेखा घिमिरे घाइते भएका छन् । घिमिरेको दाहिने खुट्टामा चोट लागेको र युनाइटेड अस्पतालमा उपचार भइरहेको प्रहरीले जनाएको छ ।
जिल्ला ट्राफिक प्रहरी कार्यालयका प्रहरी निरीक्षक राजन ढकालका अनुसार ओभरट्याक गर्ने क्रममा दुर्घटना भएको हो । दुर्घटनामा संलग्न सवारीसाधन र ट्र्याक्टर चालकलाई इलाका प्रहरी कार्यालय पिपराले नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।
