राजेश सिंह कांग्रेसको केन्द्रीय प्रतिनिधि मनोनीत

कपिलवस्तु । नेपाली कांग्रेसका पूर्व केन्द्रीय सदस्य राजेश सिंहलाई कपिलवस्तु जिल्लाको केन्द्रीय प्रतिनिधिका रूपमा मनोनयन गरिएको छ।
नेपाली कांग्रेसको १५औँ केन्द्रीय महाधिवेशन तयारी समितिका संयोजक प्रा.डा. शशाङ्क कोइरालाले भदौ १९ गते पत्रमार्फत सिंहलाई केन्द्रीय प्रतिनिधि मनोनयन गरिएको जानकारी दिनुभएको हो।
कांग्रेसको राष्ट्रिय भेला/सम्मेलनको निर्देशनअनुसार ७७ वटै जिल्लाबाट केन्द्रीय प्रतिनिधि पठाउने निर्णयअनुसार सिंहलाई कपिलवस्तु जिल्लाको प्रतिनिधिका रूपमा मनोनयन गरिएको पत्रमा उल्लेख छ।
पत्रमा स्थानीय तह, प्रदेशसभा निर्वाचन क्षेत्र र जिल्ला अधिवेशनलगायतका अधिवेशन सम्पन्न गर्न सम्बन्धित तयारी समितिहरू गठन गरी प्रतिवेदन केन्द्रीय तयारी समितिमा पठाउनसमेत आग्रह गरिएको छ।
कांग्रेसको केन्द्रीय कार्यसमितिको आधिकारिकतासम्बन्धी विवाद सर्वोच्च अदालतमा विचाराधीन रहेको अवस्थामा महाधिवेशनको तयारी अघि बढाइएको पत्रमा उल्लेख छ। संयोजक कोइरालाले सबै तहमा सबल, सक्षम र लोकप्रिय कांग्रेस निर्माणका लागि एकताबद्ध भएर अघि बढ्न आग्रह गर्नुभएको छ।