प्रेस युनियन कपिलवस्तुको अध्यक्षमा चापागाईं पुनः सर्वसम्मत

कपिलवस्तु, असोज ७ गते । नेपाल प्रेस युनियन कपिलवस्तु शाखाको अध्यक्षमा खगप्रसाद चापागाईं पुनः सर्वसम्मत चयन हुनुभएको छ । शाखाको १३ औँ साधारणसभा तथा ८औँ शाखा अधिवेशनबाट चापागाईंको नेतृत्वमा नयाँ कार्यसमिति चयन गरिएको हो ।
अधिवेशनले महिला उपाध्यक्षमा पूजा गुप्ता, उपाध्यक्षमा अशोक पौडेल, सचिवमा अंकुश श्रीवास्तव, कोषाध्यक्षमा ब्रिजेस जयसवाल र सहसचिवमा बसन्ता भुसाललाई चयन गरेको छ । सदस्यमा सुग्रीम बरई, सुवास पौडेल, बसन्त बन्जाडे, सुधांशु गिरी, अनिल कुमार माली, रामाशंकर तिवारी, कृष्ण कुमार यादव, नवीन भुसाल र नन्दकिशोर कुर्मी लगायत चयन हुनुभएको छ ।
अधिवेशनको उद्घाटन गर्दै नेपाल प्रेस युनियनका केन्द्रीय अध्यक्ष शिव लम्सालले पत्रकारिता क्षेत्रको विश्वसनीयता कायम राख्न पत्रकारले आचारसंहितामा रहेर तथ्यमा आधारित समाचार सम्प्रेषण गर्नुपर्ने बताउनुभयो । पत्रकारले समाजमा हुने अन्याय र अत्याचारका विषयमा आवाज उठाउँदै सत्यतथ्यलाई प्राथमिकता दिनुपर्ने उहाँको भनाइ थियो ।
संविधानसभा सदस्य अतहर कमालले पत्रकारिता समाजको ऐना भएकाले पत्रकारले निष्पक्षता र जिम्मेवारीलाई केन्द्रमा राखेर काम गर्नुपर्ने बताउनुभयो । उहाँले पत्रकारिता क्षेत्रको विकासका लागि सबै पक्षबीच सहकार्य आवश्यक रहेको उल्लेख गर्नुभयो ।
लुम्बिनी प्रदेश सभा सदस्य सुधाकर पाण्डेले पत्रकारले सत्य र तथ्यमा आधारित भएर समाचार लेख्नुपर्ने बताउँदै समाजका विकृति, विसङ्गति तथा अन्यायविरुद्ध कलम चलाउन आग्रह गर्नुभयो । पत्रकारको काम, कर्तव्य र अनुभवले नै पत्रकारिताको महत्त्व स्थापित गर्ने उहाँको भनाइ छ ।
बुद्धभुमि नगरपालिका नगर प्रमुख केशव कुमार श्रेष्ठले पछिल्लो समय सञ्चारमाध्यम तथा मिडिया हाउसहरू चुनौतीपूर्ण अवस्थामा रहेकाले पत्रकारिता क्षेत्रलाई व्यावसायिक र सक्षम बनाउन सबैको सहकार्य आवश्यक रहेको बताउनुभयो । पत्रकारमा व्यावसायिक स्वच्छता र जिम्मेवारी हुनुपर्ने उहाँको भनाइ थियो ।
कार्यक्रममा पूर्वपार्टी सभापति राजेश आचार्य, गैरसरकारी संस्था महासङ्घका अध्यक्ष जयप्रकाश पाण्डे, नेपाल पत्रकार महासङ्घ कपिलवस्तुका अध्यक्ष डिलाराम भुसाल, प्रेस युनियन रुपन्देहीका सचिव लगायतले शुभकामना व्यक्त गर्नुभएको थियो ।
कार्यक्रममा नेपाल प्रेस युनियन कपिलवस्तु शाखाले प्रदान गर्ने ‘स्वर्गीय गिरिजाप्रसाद कोइराला स्मृति पत्रकारिता पुरस्कार–२०८३’ बाट पत्रकार गोपाल भण्डारी र राजु खराललाई सम्मान गरिएको थियो ।
शाखाका उपाध्यक्ष गणेश पोखरेलले स्वागत गर्नुभएको कार्यक्रम अध्यक्ष खगप्रसाद चापागाईंको अध्यक्षतामा सम्पन्न भएको हो ।