कपिलवस्तु, असोज ८ गते । कपिलवस्तु नगरपालिकाले नगरवासीलाई स्वास्थ्य बीमामा आबद्ध गराउन वार्षिक बीमा योगदान रकमको आधा हिस्सा व्यहोर्ने भएको छ । यससम्बन्धी नगरपालिकाले स्वास्थ्य बीमा बोर्ड, जिल्ला सम्पर्क शाखा कार्यालय कपिलवस्तुसँग सम्झौता गरेको छ ।
सम्झौताअनुसार पाँच जनासम्मको परिवारका लागि लाग्ने वार्षिक रु. ३ हजार ५ सय बीमा शुल्कमध्ये रु. १ हजार ७ सय ५० नगरपालिकाले व्यहोर्नेछ । बाँकी रकम भने सम्बन्धित बीमित परिवारले तिर्नुपर्नेछ । पाँच जनाभन्दा बढी सदस्य रहेको परिवारको थप बीमा शुल्क पनि परिवार आफैँले व्यहोर्नुपर्नेछ ।
नगर प्रमुख सुदीप पौडेलले आर्थिक अवस्थाका कारण स्वास्थ्य बीमामा आबद्ध हुन नसकेका परिवारलाई समेत समेट्ने उद्देश्यले नगरपालिकाले बीमा शुल्कमा योगदान गर्ने निर्णय गरेको बताउनुभयो । “स्वास्थ्य सेवामा सबै नगरवासीको समान पहुँच सुनिश्चित गर्न स्वास्थ्य बीमालाई विस्तार गर्न खोजिएको हो,” उहाँले भन्नुभयो ।
स्वास्थ्य बीमा बोर्ड कपिलवस्तुका प्रमुख वशिष्ठ तिवारीले स्थानीय तहबाट बीमा शुल्कमा सहयोग भएपछि स्वास्थ्य बीमामा आबद्ध हुने परिवारको सङ्ख्या बढ्ने अपेक्षा गरिएको बताउनुभयो । उहाँले स्वास्थ्य उपचारमा लाग्ने खर्चको भार कम गर्न स्वास्थ्य बीमा महत्वपूर्ण भएकाले नगरपालिकाको कार्यक्रमले बीमा पहुँच विस्तारमा सहयोग पुग्ने बताउनुभयो ।
नगरपालिकाले स्वास्थ्य बीमा कार्यक्रमबाट लाभ लिन इच्छुक नगरवासीलाई सम्बन्धित वडामार्फत आवश्यक प्रक्रिया पूरा गरी कार्यक्रममा आबद्ध हुन आग्रह गरेको छ ।
