काठमाडौँ, असोज १२ गते । सर्वोच्च शिखर सगरमाथालगायत हिमाली क्षेत्रमा सोमबार बिहानैदेखि घाम लागेको छ । घाम लागेर आकाश खुलेसँगै हिमाली जनजीवन सक्रिय बन्न थालेको छ ।
विशेषगरी सगरमाथा क्षेत्रमा आरोहणका लागि गएका पर्यटकमा खुसी छाएको छ । सगरमाथा आधार शिविर तथा पिरामिड प्रयोगशाला आसपासको वातावरण घाम लागेपछि रमणीय बनेको छ ।
सेताम्मे बाक्लो हिउँले सगरमाथा क्षेत्रमा हिउँद आइसकेको झल्को दिएको पिरामिड प्रयोगशालाका व्यवस्थापक काजी विष्टले जानकारी दिनुभयो ।
उहाँले भन्नुभयो, “आज बिहानैदेखि घाम लागेको छ । चिसो भए पनि घमाइलो भएर आकाश खुलेको छ । झन्डै साढे ६ फिट हिउँ परेको थियो ।”
घामको रापसँगै ढुङ्गा–पहाडमा जमेको हिउँ थोरै पग्लन थालेको छ । हिउँले ढपक्कै ढाकेको प्रयोगशालाको आसपासको हिउँ हटाएर आवागमन सहज बनाइएको उहाँले जानकारी दिनुभयो ।
हिमपातपछि हराएको पर्यटक मार्ग पहिल्याउन शनिबार र आइतबार प्रयोगशालाका कर्मचारी तथा स्थानीय पथप्रदर्शकले खोजी गरेका थिए । लगातार उच्च हिमपात हुने पूर्वसूचनापछि सगरमाथा आधार शिविरमा रहेका पर्यटक सुरक्षित स्थानका लागि तल फर्किएका थिए ।
आकाश खुलेसँगै पर्यटक तथा आरोहीहरू पुनः आरोहणतर्फ जाने तयारीमा जुटेका छन् ।
