काठमाडौं, असोज १९ गते । नेपाल प्रेस युनियनका अध्यक्ष शिव लम्सालले नेपाली कांग्रेसको १५औँ महाधिवेशनमा खुलातर्फ केन्द्रीय सदस्य पदमा उम्मेदवारी घोषणा गर्नुभएको छ ।
विद्यार्थी राजनीतिबाट सार्वजनिक जीवनमा प्रवेश गर्नुभएका लम्सालले पत्रकारिता तथा पेशागत संगठनको नेतृत्वबाट प्राप्त अनुभवलाई कांग्रेसको संगठन निर्माण, नीति निर्माण तथा लोकतान्त्रिक मूल्य र मान्यताको प्रवर्द्धनमा उपयोग गर्ने उद्देश्यले उम्मेदवारी घोषणा गर्नुभएको हो ।
लम्सालको राजनीतिक यात्रा नेपाल विद्यार्थी संघबाट सुरु भएको हो । उहाँले २०५१ सालमा नेविसंघ बारा क्षेत्र नं १ को अध्यक्षको जिम्मेवारी सम्हाल्नुभएको थियो । त्यसपछि बारा, स्याङ्जा र मकवानपुरका विभिन्न क्याम्पसमा नेविसंघको संगठन निर्माण तथा विद्यार्थी गतिविधिमा सक्रिय रहनुभएको थियो ।
विद्यार्थी राजनीतिपछि पत्रकारितालाई पेशा बनाउनुभएका लम्सालले लामो समय सञ्चार क्षेत्रमा काम गर्नुभएको छ । पत्रकारितासँगै नेपाल प्रेस युनियनमा सक्रिय उहाँ काठमाडौं शाखा सभापति, केन्द्रीय सचिव र महासचिव हुँदै २०७९ सालमा अध्यक्ष निर्वाचित हुनुभएको हो । उहाँ हाल पनि युनियनको नेतृत्वमा हुनुहुन्छ ।
प्रेस तथा अभिव्यक्ति स्वतन्त्रता, नागरिक अधिकार र लोकतान्त्रिक सञ्चार प्रणालीका पक्षमा आफूले लामो समयदेखि आवाज उठाउँदै आएको लम्सालले बताउनुभएको छ । उहाँले पत्रकारको अधिकारसँगै सञ्चार क्षेत्रको संस्थागत विकास तथा प्रेस स्वतन्त्रताको संरक्षणलाई प्राथमिकतामा राख्दै आउनुभएको छ ।
कांग्रेसको १५औँ महाधिवेशनका लागि बारा क्षेत्र नं १ बाट खुलातर्फ महाधिवेशन प्रतिनिधिमा सर्वसम्मत चयन भएपछि लम्सालले केन्द्रीय सदस्यमा उम्मेदवारी घोषणा गर्नुभएको हो ।
उहाँले विद्यार्थी राजनीति, पत्रकारिता र प्रेस युनियनको नेतृत्वबाट प्राप्त संगठनात्मक अनुभवलाई कांग्रेसको मूल संगठनमा उपयोग गर्न चाहेको बताउनुभएको छ । सक्षम संगठन, सशक्त कांग्रेस र जिम्मेवार नेतृत्व निर्माण आफ्नो उम्मेदवारीको मुख्य उद्देश्य रहेको उहाँको भनाइ छ ।
लम्सालले पार्टीको केन्द्रीय समितिमा रहेर प्रेस तथा अभिव्यक्ति स्वतन्त्रता, नागरिक अधिकार र सञ्चार क्षेत्रका सवाललाई पार्टीको नीति तथा निर्णय प्रक्रियासँग जोड्ने बताउनुभएको छ । उहाँका अनुसार स्वतन्त्र प्रेस र अभिव्यक्ति स्वतन्त्रता लोकतान्त्रिक व्यवस्थाका आधारभूत पक्ष भएकाले राजनीतिक दलको नेतृत्व तहबाट समेत यसको संरक्षण र प्रवर्द्धनका लागि प्रभावकारी भूमिका आवश्यक छ ।
प्रेस युनियनको नेतृत्वमा रहँदा देशभरका पत्रकार तथा युनियनका विभिन्न संरचनासँग समन्वय गरेको अनुभवलाई पार्टीको संगठन विस्तारमा उपयोग गर्ने उहाँको भनाइ छ ।
कांग्रेसको १५औँ महाधिवेशनलाई पार्टीको आगामी राजनीतिक दिशा, संगठनात्मक संरचना र नेतृत्व चयनका दृष्टिले महत्वपूर्ण मानिएको छ । महाधिवेशनमा विभिन्न पृष्ठभूमिबाट आएका नेताहरूले केन्द्रीय सदस्य पदमा आफ्नो दाबी प्रस्तुत गरिरहेका छन् । लम्सालको उम्मेदवारीसँगै पत्रकारिता तथा पेशागत क्षेत्रको प्रतिनिधित्व र प्रेस स्वतन्त्रताका सवाल पार्टीको नीतिनिर्माण तहमा लैजाने विषयले समेत चर्चा पाएको छ ।
