कपिलवस्तु । बडादशैं, दीपावली तथा छठ पर्वको अवसरमा भवानी भिक्षु युवा क्लब, कपिलवस्तुले असोज ३१ गते सांगीतिक साँझ तथा सांस्कृतिक कार्यक्रम आयोजना गर्ने भएको छ ।
कपिलवस्तु नगरपालिका–स्थित भवानी भिक्षु चोकमा साँझ ६ बजेदेखि सुरु हुने कार्यक्रममा राष्ट्रिय कलाकार बद्री पंगेनी, BASANT & CREWS म्युजिक ब्यान्डलगायत कलाकारले प्रस्तुति दिने क्लबका अध्यक्ष हसिम मुसलमानले जानकारी दिनुभयो ।
स्थानीय कला, संस्कृति र प्रतिभाको संरक्षण तथा प्रवर्द्धन गर्नुका साथै चाडपर्वको अवसरमा मनोरञ्जन प्रदान गर्ने, सामाजिक एकता बढाउने र आपसी सद्भाव कायम गर्ने उद्देश्यले कार्यक्रम आयोजना गर्न लागिएको क्लबले जनाएको छ ।
क्लबका कोषाध्यक्ष विप्लव घिमिरेका अनुसार क्लबमा आबद्ध युवाहरू सांस्कृतिक कार्यक्रमसँगै सामाजिक तथा सामुदायिक गतिविधिमा पनि सक्रिय छन् । गत वर्ष आयोजित कार्यक्रमबाट बचत भएको रकम सामाजिक कार्यमा खर्च गरिएको उहाँले बताउनुभयो । सोही रकमबाट भवानी भिक्षु चोक क्षेत्रमा डस्टबिन राख्नेलगायतका काम गरिएको उहाँको भनाइ छ ।
क्लबले आगामी दिनमा पनि सांस्कृतिक कार्यक्रमलाई निरन्तरता दिँदै सामाजिक सेवाका गतिविधिमा सक्रिय रहने जनाएको छ ।
