रुइत फाउन्डेसनको सहयोगमा ३९ जनाको निःशुल्क मोतिबिन्दु शल्यक्रिया

कपिलवस्तु । रुइत फाउन्डेसनको सहयोगमा कपिलवस्तुमा ३९ जना मोतिबिन्दुका बिरामीको निःशुल्क शल्यक्रिया गरिएको छ। नेपाल नेत्र ज्योति संघ, लुम्बिनी नेत्र विज्ञान अध्ययन संस्थान तथा रिसर्च सेन्टरअन्तर्गत सञ्चालित तौलिहवा आँखा अस्पतालको आयोजनामा मोतिबिन्दुका बिरामीको पहिचान, उपचार तथा शल्यक्रियालाई लक्षित गरी कार्यक्रम सञ्चालन गरिएको हो।
विश्व दृष्टि दिवसको अवसरमा आयोजित कार्यक्रममा मोतिबिन्दुको समस्या भएका बिरामीलाई निःशुल्क शल्यक्रिया सेवा प्रदान गरिएको आयोजकले जनाएको छ। आर्थिक अभावका कारण उपचारबाट वञ्चित हुन सक्ने बिरामीलाई लक्षित गरी सञ्चालन गरिएको यस कार्यक्रमले उनीहरूको दृष्टि पुनःस्थापनामा सहयोग पुग्ने अपेक्षा गरिएको छ।
कार्यक्रममा सहभागी बिरामी तथा सेवाग्राहीलाई फलफूलसमेत वितरण गरिएको थियो। आँखा स्वास्थ्यप्रति जनचेतना अभिवृद्धि गर्ने, समयमै आँखा जाँच गराउने बानीको विकास गर्ने र दृष्टिसम्बन्धी समस्याको उपचारमा पहुँच बढाउने उद्देश्यले कार्यक्रम आयोजना गरिएको हो।
नेपाल नेत्र ज्योति संघ, कपिलवस्तु जिल्ला शाखा तथा तौलिहवा आँखा अस्पतालले स्थानीयस्तरमा आँखा उपचार सेवा विस्तार गर्दै आएका छन्। यस्ता निःशुल्क उपचार कार्यक्रमले विशेषगरी विपन्न तथा आर्थिक रूपमा कमजोर नागरिकलाई प्रत्यक्ष लाभ पुर्‍याउने विश्वास गरिएको नेपाल नेत्र ज्याेति संघ कपिलवस्तुका अध्यक्ष मनाेज कुमार श्रीवास्तवले बताए ।
आयोजकले आँखामा समस्या देखिएमा समयमै परीक्षण गराउन र मोतिबिन्दुजस्ता उपचारयोग्य समस्यालाई बेवास्ता नगर्न अध्यक्ष श्रीवास्तवले आग्रह समेत गरे ।