कपिलवस्तु, २ अषाढ । कपिलवस्तु जिल्लामा लगाउन शुरु गरिएको कोरोना विरुद्धको कोभिसिल्डको दोस्रो खोपमा जिल्लाका शिक्षकहरुलाई विभेद गरिएको छ । स्वास्थ्य कार्यालय कपिलवस्तुले जारी गरेको सूचना पत्र अनुसार अषाढको १ र २ गते कपिलवस्तु अस्पताल र शिवराज आधारभूत अस्पतालमा दोस्रो चरणको कोभिसिल्ड लगाईदै छ ।
सो सूचना अनुसार जिल्लाका स्वास्थ्यकर्मी, स्थानीय तहका कर्मचारी, सरकारी कर्मचारी, प्रहरी, शशस्त्र प्रहरी, नेपाली सेना, वैंक तथा वित्तिय संस्था, सार्वजनिक संस्थान तथा प्राधिकरणका कर्मचारी, पत्रकार, एम्बुलेन्स तथा शव बाहन चालकलाई खोप लगाईदै छ । तर फ्रन्टलाईनमा विद्यार्थी तथा अभिभावकहरु विचमा उपस्थित हुने शिक्षकहरुलाई भने खोप लगाउने अवसर प्रसाद गरिएको छैन ।
स्वास्थ्य कार्यालयले जिल्लाका शिक्षकहरुलाई कोभिशिल्डको दोस्रो खोपमा विभेद गरेको भन्दै नेपाल शिक्षक संघले विरोध जनाएको छ । संघका जिल्ला अध्यक्ष अफाक अहमद खांले पहिलो चरणको खोप लगाएका शिक्षकलाई दोस्रो चरणको खोपमा विभेद गरिनु आपत्तिजनक छ । अन्य सरकारी, वित्तिय तथा संस्थानका कर्मचारी सरह शिक्षकलाई पनि खोप लगाउने अवसर प्रदान गर्नु हुन संघका अध्यक्ष खांले माग गरेका छन् ।
सरकारले अषाढ १ गते देखि नयां शैक्षिक सत्र शुरु गर्न निर्देशन गरि सकेको छ । भर्ना अभियान र भदौ १ गते देखि कक्षा ११ को अध्यापन शुरु गर्ने तयारीमा विद्यालयहरु जुटेका छन् । यसरी विद्यार्थीहरु विच अग्रपंक्तिमा खटिएका शिक्षकहरुलाई नै कोभिशिल्ड दोस्रो खोपमा विभेद गरिनु समग्र शिक्षक अभिभावक तथा विद्यार्थीहरु माथिकै विभेद हो भन्दै यस तर्फ सरोकारवाला निकायको गम्भीर ध्यानआकर्षण हुनु पर्ने अध्यक्ष खांले बताए ।
