कपिलवस्तु, ३ अषाढ । वाणगंगा सिचाई व्यवस्थापन कार्यालय कपिलवस्तुले आर्थिक प्रलोभनमा परी कार्यालयको करोडौं रुपैयाको काम खुला प्रतिस्पर्धा नगराई मिलोमतोमा कोटेशन प्रक्रियाबाट नहर सफाई तथा मर्मत संभारको काम संचालन गरेको छ । कार्यालयले वाणगंगा सिचाई प्रणाली अन्र्तगतको उपभोक्ता संस्थाका पदाधिकारीहरुसंगको मिलोमतोमा खुला प्रतिस्पर्धा नै नगरी फुल रेटमा काम गराएको छ । प्रतिस्पर्धा आह्वान गरी निकै सस्तोमा सम्पन्न हुने कामलाई अषाढ मसान्त नजिकिदै गरेको बाहाना बनाएर कमिशनको लोभमा यस्तो काम गरिएको कार्यलयकै कर्मचारीहरु बताउंछन् ।
पांच पांच लाख रुपैया भित्रको टुक्रा बनाएर कार्यालय र जल उपभोक्ता संस्थाका पदाधिकारीहरुको मिलोमतोमा काम शुरु गरिएको छ । ५ लाख रुपैया बढीको एउटै प्रकृतिको कामलाई खुला प्रतिस्पर्धाबाट घटी घटाउमा गर्नु पर्ने सरकारी प्रावधान छ । बढी कमिशनको लोभमा कार्यालयले प्रतिस्पर्धा नै नगराई जल उपभोक्ता संस्थाका पदाधिकारीहरुले ल्याएको फर्मलाई फुल रेटमा काम दिएको छ । तर कार्यालय प्रमुख कोपिला श्रेष्ठले भने छिटो छरितो ढंगबाट काम सम्पन्न गर्न यस्तो प्रक्रिया अनुसार काम गराईएको बताउंछिन् ।
सिचाई प्रणाली अन्र्तगतको नहर सफाईका लागि कार्यालयले आफैले निकै सस्तो दरमा ब्याक हु लोडर र एक्साभेटर भाडामा लिईएको छ । तर भुक्तानीका लागि भने नेपाल सरकारको नम्स अनुसारको फुल रेटमा फर्मको कागज पत्र मिलाएर गर्ने तयारी गरिएको छ । कार्यालयले गरेको यस्तो कार्य प्रक्रिया प्रति लुम्विनी प्रदेश निर्माण व्यवसायी संघले विरोध जनाएको छ ।
संघका प्रशासनिक उपमहासचिव दिनेश हमालले खुला प्रतिस्पर्धाबाट घटी घटाउनमा गर्नु पर्ने काम कमिशनको खेलमा टुक्रा टुक्रा गरेर गर्नु नियमित विपरित हो, उपमहासचिव हामालले भने, “कार्यालयबाट सम्पादन गरिने सम्पूर्ण निर्माण सम्वन्धी कामहरु पारदर्शी ढंगबाट खुला प्रतिस्पर्धाबाट गराईयोस् । कमिशनका लागि यसरी अपनाईने चोर बाटो संघको लागि कदापी मान्य छैन ।”
कार्यालयले कोटेशन प्रक्रियाबाट करोड रुपैयाको यो कामबाट सरकारको खर्च समेत बढेको छ । खुला प्रतिस्पर्धाबाट यही काम गर्न आह्वान गरेको भए करीब २५ देखि ४० प्रतिशत घटी घटाउ सम्मै यो काम सम्पन्न हुन सक्छ । काममा कार्यालयका प्रमुखको नेतृत्वमा कर्मचारीहरुको ठुलै कमिशनको खेल रहेको छ निर्माण व्यवसायीहरुले बताएका छन् ।
