‘काठमाडौं । भारतको कन्नाडा फिल्म उद्योगका दाजुभाई निर्माता उमापाथी र दीपक ग्वादाको हत्याको आरोप लागेका त्यहाँका गुण्डा नाइके करिया राजेश यसैसाता पोखराबाट पक्राउ परेका छन् ।
भारतीय संचारमाध्यमका अनुसार हत्याको घटनापछि फरार भएका उनलाई पोखराको होटलबाट प्रहरीले पक्राउ गरेको हो । ३७ वर्षे राजेशलाई नेपाल प्रहरीको सहयोगमा पक्राउ गरिएको जनाइएको छ । उनको पक्राउबारे भारतीय संचारमाध्यमले प्रमुखताका साथ समाचार प्रकाशन गरेका छन् ।
ती फिल्म निर्माता दाजुभाईको हत्याको आरोप राजेशमाथि लागेको थियो । प्रहरीले खोजी सुरु गरेपछि उनी नेपाल पसेका थिए । प्रहरीको अनुसन्धानमा राजेशको मिलेमतो दाउद इब्राहिमको ग्याङका सार्पसुटर सदस्य रसिद मालबारीका दाहिने हात मानिने बम्बे रविसँग पाइएको थियो ।
डिसेम्बर २०२० मा कन्नाडाको बिग बजेटको चर्चित फिल्म ‘रोबर्ट’ निर्माण गरेका उमापाथाी र ग्वादाको हत्या भएको थियो । चाँडै हिन्दी भाषामा स्वरांकन हुने तयारीमा रहेको उ क्त फिल्म कन्नाडा र तेलेगुमा रिलिज भएको थियो । अभिनेता दर्शन मुख्य भूमिकामा थिए । मार्च ११, २०२१ मा उक्त फिल्म रिलिज भएको थियो ।
पोखराको होटलमा रहेर उनले फिल्म निर्माणका लागि पैसा जुटाउन विभिन्न व्यापारीसँग फिरौती माग्ने गरेको प्रहरीले जनाएको छ । लकडाउनपछि रिलिज भएको फिल्म रोबर्टले राम्रो कमाइ गरेपनि अर्को बिग बजेटको फिल्मले उत्साहप्रद कमाइ गरेन । ती दाजुभाईको हत्यामा फिल्मको व्यापार मुख्य कारण रहेको प्रहरी छानविनबाट खुलेको छ ।
द हिन्दू अखबारका अनुसार राजेश र रविले मृतक दाजुभाई फिल्म निर्माताबाट ३० लाख भारु मागेका थिए । पैसा मागेपछि उनीहरुले नदिएको समेत जनाइएको छ । घटनामा आरोपित अन्य ११ जनालाई प्रहरीले पक्राउ गरेपनि बम्बे रवि र राजेश फरार थिए । रविले भारत छाडेर भागेको र राजेश नेपालमा रहेको प्रहरीले सुइँको पायो ।
पक्राउपछि राजेशलाई भारतीय प्रहरीको जिम्मा लगाइएको जनाइएको छ ।
