काठमाडौँ । राष्ट्रिय जनमोर्चाका अध्यक्ष चित्रबहादुर केसीले बर्हिगमनमा परेको केपी शर्मा ओली नेतृत्वको सरकारले जनताका कुरा सम्बोधन गर्न नसकेको बताएका छन् ।
जनताका अघि कम्युनिष्ट पार्टी पनि चुकेको भन्दै उनले अरु प्रतिक्रियावादीको विश्वास पहिल्यै गुमेको अवस्थामा पाँच वर्ष जनताले पठाएका बेला कम्युनिष्ट पार्टीले जनताको विश्वास जित्न नसकेको बताए। उनले भने, ‘नेताहरुले आफूलाई बनाउन राजनीति गरेका छन्। परिवार बनाएका छन्। कम्युनिष्ट भनिरहने अनि सम्पत्ति कमाइरहने प्रवृति हावी भएको छ। जनताको विश्वास जित्न सकेका छैनन्।’
उनले पटकपटक संसद विघटन गर्ने प्रवृति अन्त्य गर्नुपर्ने बताए। उनले भने, ‘वर्तमान संसदीय व्यवस्था अन्त्य हुनुपर्छ भन्ने सैद्धान्तिक भनाइ ठिकै होला। तर जनवादी क्रान्ति सम्भव छैन। अहिलेको संसदीय व्यवस्थालाई सुधार गर्न सकिन्छ। पैसा भएकाहरु जाने हो संसदमा१’
उनले जनताले खोप मागेका बेला ओली सरकारले निवार्चनका लागि ‘व्यालेट पेपर’ दिने निर्णय गर्नु कम्युनिष्ट आन्दोलनबिपरीत भएको बताए।
४३ औँ पुष्पलाल स्मृति दिवसको उपलक्ष्यमा ललितपुरको च्यासलमा शुक्रबार आयोजित नेपाली कम्युनिष्ट आन्दोलनको वर्तमान संकट र आगामी बाटो बिषयक प्रवचन कार्यक्रममा उनले भने,‘ सर्वोच्चको फैसला न्यायपूर्ण छ। अहिलेको विकृतिलाई रोक्न सर्वोच्चको भूमिका अहम् छ।’
उनले केपी ओली नेतृत्वको सरकारले बिचित्रको काम गरेको उल्लेख गरे । जनता कोरोना महामारीबाट ज्यान खोप माग्ने तर सरकार भने भोट माग्ने बिचित्रको राजनीति भएको बताए । नेता केसीले चुनाव जित्नका लागि खर्च गर्ने र चुनाव जितेपछि भष्टाचार गर्ने सर्वस्वीकार्य विषय भएको बताउँदै आफूले प्रत्यक्ष रुपमा यस्ता घटनाहरूको साक्षी भएको उल्लेख गरे ।
