काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका वरिष्ठ नेता माधवकुमार नेपालबीच नेपालकै निवास कोटेश्वरमा भेटवार्ता भएको छ।
एमाले एकताको निम्ती प्रयास भइरहेको र आइतवार कि वार कि पार भन्ने अवस्था आइपुगेको अवस्थामा प्रचण्ड कोटेश्वर पुगेका हुन् । प्रधानमन्त्री शेर बहादुर देउवाले आज मन्त्रिपरिषद विस्तारको तयारी गरेका छन् ।
सोही कारण पनि सत्ता सहकार्यबारे छलफल गर्नका लागि नेता नेपाललाई भेट्न प्रचण्ड उनको निवासमै पुगेका थिए । उनीहरवीच सरकार विस्तार र नेपाल पक्षको सहभागिताबारे छलफल भएको थियो ।
प्रधानमन्त्री शेरबहादुर देउवालाई विश्वासको मत दिएको नेपाल पक्षभित्र सरकारमा जान हुने र नहुनेमा दुई मत छ। एमाले एकताको प्रयास भइरहेकाले तत्काल सरकारमा जान नहुने एकथरीको तर्क छ भने अर्कोथरी नेताहरूले आफूहरूकै कारण प्रतिनिधि सभा बचेको र देउवा प्रधानमन्त्री भएको भन्दै त्यसको अपनत्व लिनका लागि पनि सरकारमा जनुपर्ने तर्क छ।
नेता नेपाललाई भेटेर प्रचण्ड अहिले माओवादीको स्थायी समिति बैठकमा सहभागी भएका छन्। बैठक माओवादीको केन्द्रीय कार्यालय पेरिसडाँडामा जारी छ। आजको बैठकले पार्टीका तर्फबाट सरकारमा सहभागी हुने व्यक्तिको नामसमेत टुंगो लगाउने जनाइएको छ।
असार २९ गते प्रधानमन्त्रीको शपथ लिएका देउवाले हालसम्म पनि सरकारलाई पूर्णता दिन नसकेको भन्दै उनको आलोचना हुन थालेको छ। गठबन्धनमा रहेका नेताहरु मन्त्रीहरुको नाम दिन नसक्नु र एमालेको नेपाल पक्षले पनि स्पष्ट निर्णय दिन नसकेको कारण मन्त्रिपरिषदलाई पूर्णता दिन देउवाले सकेका छैनन् ।
