काठमाडौं । सत्तारुढ गठबन्धनका शीर्ष नेताहरुवीच छलफल भएको छ ।
प्रधानमन्त्रीको सरकारी निवास बालुवाटारमा नेताहरुबीच बिहान साढे ११ बजेदेखि छलफल चलिरहेको हो ।
सत्ता सम्हालेको करिब महिना दिन पुगिसक्न लाग्दा पनि मन्त्रिपरिषद विस्तार गर्न नसकेका प्रधानमन्त्री शेर बहादुर देउवाले सरकारलाई पूर्णता दिने विषयमै नेताहरुसँग छलफल गरेका हुन् ।
छलफलमा काँग्रेसका सभापति तथा प्रधानमन्त्री देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र जनता समाजवादी पार्टीका अध्यक्ष उपेन्द्र यादवलगायतका नेता छन् । उनीहरुबीच पाँच दलीय गठबन्धनद्वारा सरकार सञ्चालनमा सघाउन गठित काँग्रेस महामन्त्री पूर्णबहादुर खड्काको संयोजकत्वको कार्यदलले बुझाएको प्रतिवेदनबारे छलफल भइरहेको बुझिएको छ ।
गठबन्धनको सात सदस्यीय कार्यदलले शुक्रबार सरकार सञ्चालनका लागि न्यूनतम साझा कार्यक्रम र कार्यविधि शीर्ष नेतालाई बुझाएको थियो । उक्त प्रतिवेदन आजै सार्वजनिक गर्ने कार्यक्रम रहेको छ । कार्यदलको प्रतिवेदनपछि गठबन्धनका शीर्ष नेताहरुले मन्त्रिपरिषदलाई पूर्णता दिने बताउँदै आएका छन् ।
आजै सरकारले आफ्ना न्यूनतम कार्यक्रमहरु पनि सार्वजनिक गर्ने तयारी छ ।
