आम निर्वाचनको परिणाम अनुसार नेपाली कांग्रेसलाई नेपाली जनताले प्रमुख प्रतिपक्षको भूमिका निर्वाह गर्न र नेकपालाई ५ वर्ष स्थायी सरकार चलाउन म्याण्डेड दिएका थिए। स्पष्ट २ तिहाईको म्याडेड पाएको केपी शर्मा ओली नेतृत्वको कम्युनिष्ट सरकार आफ्नै दलको खिचातानीका कारण ढल्न पुग्यो । नेपाली जनताले कम्युनिष्ट सरकारसंग गरेको अपेक्षालाई प्रधानमन्त्री केपी शर्मा ओली नेतृत्वको सरकारले खासै उपलब्धी दिन सकेन । ईतिहासकै लागि नेपालका कम्युनिष्टहरुले आफ्नै २ तिहाईको सरकार ढालेर पार्टी समेत फोडेको यो घटना कलंकको रुपमा परिचित रहने छ ।
कम्युनिष्टहरुको आपसी वैमनश्यता र राजनैतिक ईगोका कारण हाल नेपाली कांग्रेसको नेतृत्वमा सरकार बन्न पुगेको छ । संसदमा प्रमुख प्रतिपक्षीका रुपमा मुलुकमा बढ्दै गएको केपी ओली सरकारको तानाशाही, महंगी, भष्टचार, हत्या, हिंसा जस्ता घटनाहरुमा खासै भूमिका निर्वाह गर्न नसकेको नेपाली कांग्रेस अहिले मुलुकको सत्ताधारी दलको रुपमा उपस्थित छ ।
वर्तमान प्रधानमन्त्रीबाट अब नेपाली जनताले निवर्तमान प्रधानमन्त्री केपी शर्मा ओली सरकारमा भन्ने गरिएको अधिनायकवाद, निरंकुशताको अन्त्य गरी विधीको विधान अनुसार देश चल्ने अपेक्षा गरेका छन् । मुलुकमा बढ्दै गएको महंगी, भष्टचार, हत्या हिंसाको अन्त्य भई शान्त समाजको निर्माणमा वर्तमान प्रधानमन्त्री देउवाको नेतृत्वको सरकारले काम गर्ने छ भन्ने आशा र भरोसा नेपाली जनतामा छाएको छ । हिजो केपी ओली नेतृत्वको सरकारको कार्यशैलीको जसरी विरोध गरिएको थियो अब देउवा सरकारले त्यस्तो कार्यशैली नअपनाओस् भन्ने नागरिकको चाहना छ ।
वर्तमान देउवा सरकारमा अबको ३ तहको निर्वाचन गराउने जिम्मेवारी छ । आगामी निर्वाचन सम्मको अवधिमा आम नागरिकहरुका पक्षमा सरकारले उल्लेख्य काम गर्न सके जनता माझ यो सरकारको साख बढ्ने छ । होईन भने विस्तारै यो सरकार पनि भष्टचार, निरंकुशतामा डुब्दै विधि विधानलाई लत्याएर अघि बढे यसको हिसाब आगामी निर्वाचनमा नेपाली जनताले देखाउने छन् । तसर्थ पनि प्रधानमन्त्री देउवा सामु सत्ता संचालनका लागि ठुलो चुनौती छ ।
एकातर्फ नेपाली कांग्रेस भित्रकै गुट उपगुटको व्यवस्थापन सत्ता संचालनमा छदैछ भने अर्को तर्फ प्रमुख प्रतिपक्ष केपी ओली नेतृत्वको नेकपाको विरोध र सदनमा झेल्नु पर्ने अप्ठेरोका विचबाट प्रधानमन्त्री देउवा गुज्रिनु पर्ने अवस्था छ । तसर्थ पनि आफ्ना दलका सवै विवादहरु मिलाउंदै चुनावी जिम्मेवारी बोकेको यो सरकारलाई जनताका पक्षमा पूर्ण उत्तरदायी बनाउन सके नेपाली कांग्रेसको भविष्य आगामी निर्वाचनमा सुनिश्चित होला । होईन भने प्रधानमन्त्री देउवासंगै नेपाली कांग्रेसलाई पशुपतिनाथले मात्रै बचाउन सक्लान् । जनताबाट तिरस्कार बाहेक अरु केही प्राप्ति हुने वाला छैन । देउवा सरकारको हातमा नेपाली कांग्रेसको भविष्य अडिएको छ ।
