कपिलबस्तु, असोज २०
कपिलवस्तुको कृष्णनगर नगरपालिकामा झाडापखालाको महामारी बढ्दो छ । आइतबारदेखि फैलिएको महामारीबाट दुइ जनाको मृत्यु भएको छ भने तीन सय बढी बिरामी छन ।
झाडापखालाको महामारीका कारण कृष्णनगर नगरपालिकाको वडा नं. ९ वहादुरगन्जका ५ वर्षीय राज कश्यप र वडा नं. ८का ४० वर्षिय राम प्रसाद केवटको मृत्यु भएको बताइएको छ ।
कश्यपको निजी क्लिनिकमा उपचारको क्रममा तथा केवटको उपचार अभावमा घरमै मृत्युभएको मृतक परिवारको भनाइ छ । अस्ताल श्रोतका अनुसार ३५ जना बिरामीलाइ अन्य अस्पतालहरूमा रेफर गरिएको छ भने एक सयजना सन्चो भइ घर फर्केको अवस्था छ । शिवराज अस्पतालका निमित्त मेडकल सुपरिटेन्डेन्ट मुकेश चौधरीले अस्पतालमा भर्ना रहेका एक सय ६५ जना बिरामीको अझैपनि उपचार भइरहेको बताएका छन ।
महामारी बढ्दै गएपछि स्थानीय निजी क्लिनिक र स्वास्थ्य चौकीहरू पनि भरिभराउ छन । पानीबाट फैलिने रोग भएकोले दुषित पानी वा खेतको माछा खादा महामारी बढेको हुन सक्ने चिकित्सकहरूको आशंका छ ।
महामारी नियन्त्रण तथा बिरामीहरूको उपचारका लागि प्रादेशिक अस्पताल बुटवल र जिल्ला अस्पताल तौलिहवाबाट चिकित्सकहरूको टोली परिचालन गरिएको जिल्ला स्वास्थ्य कार्यालयका प्रमुख हेमराज पाण्डेयले बताएका छन । त्यस्तै शिवराज नगरपालिका र कृष्णानगरको बिभिन्न स्वास्थ्य चौकीहरूबाट पनि चिकित्सक र नर्सहरू खटाइएको उनले बताए ।
महामारीबाट कृष्णनगर नगरापलिकाको बहादुरगन्ज, सुखरामपुर, देवानगढिया, जमुनी, दयानगर, विजयनगर, जुमिला र डबरा गाउँ ग्रसित छन । बिरामीहरूको उपचार तथा महामारी नियन्त्रणमा कुनै कन्जुस्याइ नरहेको नगरप्रमुख रजत प्रताप शाहले बताएका छन । उनले महामारी फैलिएको सबै वडामा सरसफाइ तथा जनचेतनामूलक कार्यक्रमहरू गर्न सम्बन्धित वडाध्यक्षलाइ निर्देशन दिइएको बताए ।
कपिलबस्तुमा झाडापखाला संक्रमितको संख्य तीन सय पुग्यो, ५ वर्षीय वालक सहित दुइको मृत्यु
