काठमाडौं : नेपाली कांग्रेसले आज प्रतिनिधिसभा र प्रदेश सभा उम्मेदवार टुंगो लगाउने भएको छ । शुक्रबार राति अबेर सिट बाँडफाँट टुंगो लागेपछि कांग्रेस पार्टीबाट उम्मेदवार छान्न जुटेको हो ।
रातिदेखि नै सुरु भएको कांग्रेस संसदीय बोर्डको बैठकले आज बिहानसम्म १० उम्मेदवारको टुंगो लगाएको हो ।
बैठकमा सहभागी एक नेताका अनुसार डडेल्धुराबाट प्रधानमन्त्री शेरबहादुर देउवाको उम्मेदवारी निश्चित भएको छ । त्यस्तै दिलेन्द्र प्रसाद बडु दार्चुलाबाट उम्मेदवार बन्ने भएका छन् भने सहमहामन्त्री बद्रीप्रसाद पाण्डे बाजुराबाट कांग्रेस उम्मेदवार बन्नेछन् । बडु र पाण्डे संस्थापनइतर हुन्।
त्यस्तै दुई निर्वाचन क्षेत्र भएको अछाममा कांग्रेसले एक सिट पाएको छ । उक्त निर्वाचन क्षेत्रमा जिल्ला सभापति पुष्पबहादुर शाह उम्मेदवार बन्ने भएका छन् । उनी २०७४ सालको निर्वाचनमा बामगठबन्धनसँग झिनो मतले पराजित भएका थिए ।
त्यस्तै मुगुका सभापति ऐनबहादुर शाही पनि प्रतिनिधिसभा उम्मेदवार बन्ने भएका छन् । उनको नाम जिल्लाबाट उम्मेदवारका रुपमा एकल सिफारिस भएको थियो ।
मनाङबाट नेता टेकप्रसाद गुरुङ गठबन्धनको साझा उम्मेदवार बन्नेछन्। उनी पूर्वमन्त्रीसमेत हुन् । कांग्रेस केन्द्रीय सदस्य सीता गुरुङ फेरि चुनाव लड्ने भएकी छन् । उनी तेह्रथुमबाट प्रतिनिधिसभा उम्मेदवार बनेकी हुन् ।
प्रदेशतर्फ जुम्ला ख बाट ललितजङ्ग शाही र तेह्रथुम क बाट सन्तोष सुब्बाले अवसर पाएका छन् । ताप्लेजुङ ख बाट खेगन सिंह हाङवाङलाई उम्मेदवार बनाउने निर्णय कांग्रेसको संसदीय बोर्डले गरेको छ ।
