राष्ट्रिय सभाका निवर्तमान सदस्य एवं कपिलवस्तुका काँग्रेसका नेता दृगनारायण पाण्डे नेकपा एमाले प्रवेश गरेका छन् ।
२०७४ को चुनावमा एमालेबाटै प्रदेश सभा सदस्यमा निर्वाचित भई प्रदेश सभाको सामाजिक विकास समिति सभापति रहेका उनी दुई वर्षअघि काँग्रेस प्रवेश गरेर राष्ट्रिय सभा सदस्यमा निर्वाचित भएका थिए ।
लुम्बिनीमा शङ्कर पोखरेल नेतृत्वको सरकारलाई बहुमत आवश्यक परेका बेला पाण्डेले राजीनामा दिएका थिए । त्यतिबेला नेपाली काँग्रेस, नेकपा माओवादी केन्द्रसहितको गठबन्धनलाई सहयोग पुग्ने गरी राजीनामा दिएपछि उनलाई नेपाली काँग्रेसले राष्ट्रियसभा सदस्यको उम्मेदवार बनाएको थियो । उनले राजीनामा दिएपछि पोखरेललाई मुख्यमन्त्रीमा आवश्यक बहुमत पुगेको थिएन ।
यसपटक प्रतिनिधिसभामा टिकटका आकाङ्क्षी उनी टिकट नपाएपछि असन्तुष्ट थिए । पाण्डेले सोमबार एक विज्ञप्ति जारी गर्दै विगतमा आफू आबद्ध पार्टीमै फर्किएको उल्लेख गरेका छन् । देश, जनता र आफ्नो निकासका लागि एमालेबाटै हुने देखेर आफू एमालेमा समाहित भएको उनको विज्ञप्तिमा उल्लेख छ ।
