कपिलवस्तु । नेपाली कांग्रेसका नेता रविन्द्रनाथ ठाकुरले आगामी स्थानीय तह निर्वाचनमा कपिलवस्तु नगरपालिकाको नगर प्रमुख पदमा उम्मेदवारी दिने घोषणा गर्नुभएको छ।
ठाकुरले विसं २०४८ देखि नेपाली कांग्रेसको सक्रिय राजनीतिमा संलग्न रहँदै पार्टी संगठन निर्माणमा लामो समयदेखि योगदान दिँदै आएको बताउनुभयो। उहाँ नगर समिति, क्षेत्रीय समिति र जिल्ला समितिमा रहेर काम गरिसक्नुभएको छ। उहाँ तीनपटक महाधिवेशन प्रतिनिधि र दुईपटक महासमिति सदस्यसमेत भइसक्नुभएको छ।
उहाँका अनुसार विसं २०४८ मा नेपाल ललितकला सङ्घ स्थापना गरी राष्ट्रिय उपाध्यक्षको जिम्मेवारी सम्हाल्नुभएको थियो। उक्त जिम्मेवारीमा रहँदा दुई कार्यकालसम्म देशका विभिन्न भूभागमा पुगेर संगठन विस्तार तथा निर्माणको काम गरेको उहाँले बताउनुभयो।
विसं २०५५ मा पार्टीको सिफारिसमा नगर विकास समितिको सदस्य भएपछि एआई र युडिएलीको सहयोगमा कपिलवस्तु नगरपालिकाको दीर्घकालीन विकास योजना (मास्टर प्लान) तयार गरिएको उहाँले बताउनुभयो। तर, उक्त मास्टर प्लान त्यसपछिका कुनै पनि नगर प्रमुखले हेर्ने अवसरसमेत नपाएको र हालसम्म नगरपालिकाको दीर्घकालीन योजना निर्माण तथा कार्यान्वयनका लागि पहल नभएको उहाँको भनाइ छ।
तर, उक्त योजना तयार भए पनि त्यसपछिका नगर प्रमुखहरूले त्यसलाई कार्यान्वयनमा ल्याउन चासो नदेखाएको उहाँको भनाइ छ। नगरपालिकाको व्यवस्थित र दीर्घकालीन विकासका लागि तयार गरिएको योजनालाई कार्यान्वयनमा ल्याउनुपर्ने आवश्यकता उहाँले औँल्याउनुभएको छ।
लामो राजनीतिक तथा संगठनात्मक अनुभवलाई नगरको विकास र समृद्धिमा उपयोग गर्ने उद्देश्यले नगर प्रमुखमा उम्मेदवारी दिने निर्णय गरेको ठाकुरले बताउनुभयो।
















































