कपिलवस्तु, १ मङ्सिर । आन्तरिक राजस्व कार्यालय कृष्णनगरमा राष्ट्रिय कर दिवस मनाइएको छ ।
‘कर न्याय र सुशासनको सुनिश्चितता : समृद्धिमा नागरिक सहभागिता’ भन्ने नाराका साथ मंगलबार कार्यालय परिसरमा दिवस मनाइएको हो ।
दिवसका अवसरमा कार्यालयमा सेवा लिन आउने पहिलो सेवाग्राहीलाई प्रमाणपत्र प्रदान गरी सम्मान गरिएको थियो । कार्यक्रममा कार्यालयका कर्मचारी, सेवाग्राही तथा सरोकारवालाको सहभागिता रहेको थियो ।
कार्यक्रममा आन्तरिक राजस्व कार्यालय कृष्णनगरका प्रमुख कर अधिकृत कृष्णप्रसाद न्यौपानेले कर प्रणालीलाई पारदर्शी, व्यवस्थित र प्रभावकारी बनाउन सबैको सहयोग आवश्यक रहेको बताउनुभयो । उहाँले करदातालाई सहज रूपमा सेवा प्रदान गर्ने, करसम्बन्धी सचेतना अभिवृद्धि गर्ने तथा कर तिर्ने संस्कृतिको विकास गर्ने उद्देश्यले दिवस मनाइएको बताउनुभयो ।
उहाँले राज्यको विकास र समृद्धिका लागि कर राजस्व महत्वपूर्ण स्रोत भएकाले प्रत्येक नागरिक तथा व्यवसायीलाई आफ्नो कर दायित्वप्रति जिम्मेवार बन्न आग्रह गर्नुभयो ।
















































