मृगौला समबन्धी जटिल रोगले ग्रसित छोरीको आर्थिक अभावले उपचारमा समस्या

कपिलवस्तु १ माघ
मृगौला सम्बन्धी जटिल रोग (नेफ्रोटिक सिन्ड्रम) ले ग्रसित आफनो १७ बर्षिया छोरी आशिका पुनको उपचारमा सहयोग गर्न आमाले याचना गरेकी छिन । कपिलवस्तुको बुद्धभुमी नगरपालिका वडा नं. २ गोरुसिङ्गेकी ४२ बर्षिय दुर्गा पुनले आशिकाको उपचारमा सहयोग गरी आफनो छोरीको ज्यान बचाई दिन अपील गरेकी छिन ।
तौलिहवामा संचारकर्मीसंग कुराकानी गर्दै उनले यही छोरी बाहेक आफ्नो कोही नभएको भन्दै सबैको साथ र सहायोग पाए छोरीको जीवन बच्ने बताएकी छिन । ‘ मेरो सम्पती जे भने पनि भएकी यिनै छोरी हुन । यिनलाई केहि भए, म बाँच्नु को के सार भयो र ?’ कपिलवस्तुको बुद्धभुमी नगरपालिका वडा नं. २ गोरुसिङ्गेकी ४२ बर्षिय दुर्गा पुनले गहभरी आशु पार्दै भनिन । सम्पत्तीको नाममा जग्गाको एक टुक्रा जग्गा जमिन नभएकी उनलाई ७ बर्ष अघि भएकी एउटी छोरीलाई पनि मृगौला सम्बन्धि जटिल रोग लागे पछि झनै चिन्ताले सताएको छ ।
उनकी १७ बर्षिय छोरी आशिका पुन मृगौला सम्बन्धि जटिल रोग (नेफ्रोटिक सिन्ट्रोम) ले पिडित छन । सो समस्याका कारण उनको पिसाबबाट प्रोटिनको मात्रा निस्किएर उपचार नपाए शरिर सुन्निने गरेको छ । बिद्यालयमा पढ्दा पढदै अचेत हुने जीउ सुन्नीने लगायतका समस्या हुने गरेकोले उनको पढाईमा पनि धेरै प्रभाव परेको छ । आफ्नो जग्गा जमिन नभएकी उनले आफ्नी बैनीको ६ धुर जग्गामा टिनको छानो हालेको घर बनाएकी थिईन । त्यस पछि ऋण धन गरेर ६ बर्ष अघि श्रीमान प्रेम बहादुर पुनलाई बैदेशिक रोजगारीमा मलेसिया पठाईन । श्रीमानले मलेसियाबाट छोरीको उपचारका लागी नियमित पैसा पठाउन थाले ।
छोरी आशिकाको बुटवलमा उपचार संभव नभए पछि दुर्गाले काठमाण्डौंको कान्ती बाल अस्पतालमा निरन्तर उपचारका लागि लैजाने गरेकी थिईन । तर, परिवार चलाउने र छोरीको उपचारका लागी बिदेशमा रहेका प्रेमको मुटुको समस्याले २०७७ भदौ २४ गते मृत्यु भयो । मुटुको समस्याले मृत्यु भएको भन्दै कम्पनीले उनका आश्रित परिवारलाई कुनै पनि रकम दिएन ।
यता, छोरीको उपचारका लागी धेरै समस्या परे १५÷२० दिनमा नभए १ महिनामा काठमाण्डौंको बिर अस्पतालमा पुर्याएर उपचार गराउनु पर्ने बाध्यता दुर्गाको छ । पढाईमा अब्बल रहेकी आशिकालाई बाणगंगा नगरपालिकाको मोतीपुरको पारिजात ईग्लिस बोर्डिङ्ग स्कुलले निशुल्क पढाएको छ । तर उपचारका लागी हिडीराख्ने भए पछि आशिकाको पढाई र परिक्षा प्रभावित हुने गरेको छ । अहिले बाख्रा पालेर जसो तसो घर खर्चको जोहो गर्दै आएकी दुर्गालाई छोरीको उपचारका लागी आवश्यक पर्ने मासिक ३०÷३५ हजार जुटाउन समस्या पर्दैै आएको छ ।
छोरीको लागि उपचारमा जाँदा छिमेकीले बाख्राहरुलाई हेरेर सहयोग गर्ने गरेका छन । तर अहिले भने उपचारको रकम जोहो नहुदाँ छोरीको अबको उपचार कसरी गर्ने भन्ने चिन्ता दुर्गालाई परेको छ । ‘ श्रीमान हुदाँ सम्म जसो तसो उपचार खर्च जुटाएकी थिए । डाक्टर साहबले लामो समय औषधी गर्नु पर्छ भन्नु भएको छ । छोरीको उपचार गर्न अब दाता र सहयोगीको खोजीमा छु । उनले आसु झार्दै भनिन् । आफु सँग छोरीको उपचारका लागि श्रोत साधन नभएकाले समस्यामा परेको जनाउदै उनले सहयोगी हातहरु सँग छोरीको उपचारमा सहयोग गरिदिन आग्रह गरिन् ।