आज विश्व–सिमसार दिवस ःसंरक्षण अभावमा सिमसार क्षेत्र मासिँदै

                               कपिलबस्तुको जगदिशपुर ताल । तस्विरः अनिल मल्ल
कपिलबस्तु, माघ १९ गते । आज विश्व–सिमसार दिवस मनाइँदैछ । पर्यावरण र जलाधारका लागि सिमसारको भूमिका महत्त्वपूर्ण मानिन्छ । ‘मानिस र प्रकृतिका लागि सिमसार बचाउने कदमहरूका रुपमा सिमसार क्षेत्रहरुको जगेर्ना’ भन्ने नाराका साथ यसवर्षको सिमसार दिवस मनाउन लागिएको हो ।
सिमसार पानी र जमिन मिश्रित दलदल भू–भाग हो । जुन बाह्रै महिना ओसिलो र धापिलो हुन्छ । यस्ता सिमसार क्षेत्रहरूहरु दुर्लभ चरा–चुरुङ्गीहरुको पनि मुख्य बासस्थान मानिन्छ । नेपालको सिमसार क्षेत्रमा बच्चा कोरल्न रुसको साइबेरियादेखि चराहरु आइपुग्ने गरेका विभिन्न अध्ययनहरूले देखाएको छ । यसबाहेक सिमसारले बाढी, पहिरो, अतिवृष्टि, अनावृष्टिलाई पनि प्राकृतिक सुरक्षा दिन्छ । नेपालमा ठूला–साना गरी झण्डै ४ हजार सिमसार क्षेत्र छन् । विश्व रामसार सूचीमा नेपालका १० वटा सिमसार क्षेत्र दर्ता भएका छन् ।
जसमध्ये कपिलबस्तुको जगदिशपुर ताललाई लिन सकिन्छ । जगदिशपुर ताल क्षेत्रमा गत बर्ष लुम्बिनी प्रदेश सरकारले विभिन्न कार्यक्रम गरी सिमसार दिवस मनाए पनि यस बर्ष सुनसान जस्तै रहेको छ ।
त्यस्तै कैलालीको घोडाघोडी ताल, रारा ताल, कोशी टप्पु वन्यजन्तु आरक्ष, बीसहजारी ताल, से–फोक्सुन्डो ताललगायत सिमसार क्षेत्र हुन् । तर नेपालका सिमसार क्षेत्रको संरक्षणमा चुनौती थपिँदै गएको छ । सहरीकरण तथा संरक्षणको अभावमा पछिल्ला वर्ष सिमसार क्षेत्रमा विभिन्न मानविय गतिविधिका कारण मासिँदै गएका विज्ञले बताएका छन् ।