दाङ । लुम्बिनी प्रदेश सरकारले छैटौं स्थापना दिवस स्थायी राजधानी देउखुरीमा मनाएको छ । राप्ती गाउँपालिका वडा नं ३ सिरिचौरमा भएको औपचारिक समारोहमा सरकारले विभिन्न विधामा ६१ जनालाई विभूषणसमेत प्रदान गरेको छ ।
२०७४ साल फागुन ३ गते पहिलो पटक प्रदेशमा सरकार गठन भएको दिनमा स्थापना दिवस मनाइँदै आएको छ । विभिन्न समुदायको झाँकीसहितको कला संस्कृति प्रस्तुत गरेर दिवस मनाइएको छ ।
प्रदेश प्रमुख अमिक शेरचनको प्रमुख आतिथ्यमा भएको कार्यक्रममा मुख्यमन्त्री लीला गिरीले जनताको नजिकको सरकारका रुपमा रहेको प्रदेश सरकार जनआकांक्षा पूरा गर्न प्रतिबद्ध रहेको बताए ।
संविधानले तीन तहका सरकारबीच सहअस्तित्व, समन्वय र सहकार्यको परिकल्पना गरेको उल्लेख गर्दै उनले संविधानको मर्मलाई आत्मसात गर्दै संघीयताको व्यवहारिक कार्यान्वयन गर्न सबैको सार्थक पहल आवश्यक रहेको धारणा राखे ।
‘अबको पाँच वर्ष जनताको जीवनमा परिवर्तन ल्याउनेगरी काम गर्छौं’, उनले भने, ‘यसका लागि सरकार प्रतिबद्ध छ ।’
को को भए विभूषित रु
प्रदेश सरकार स्थापना दिवसको अवसरमा विभिन्न ६१ जनालाई विभूषण प्रदान गरिएको छ । प्रदेश प्रमुख जनसेवा पदकबाट मरणोपरान्त जनार्दन यादव र जीतबहादुर थापालाई विभूषित गरिएको छ । यादवलाई संघीयता र गणतन्त्रको स्थापनामा सहयोग पु¥याएको र थापालाई जनयुद्धमार्फत लोकतान्त्रिक गणतन्त्र स्थापनामा विशेष योगदान पु¥याएको भन्दै विभूषित गरिएको हो । थापा घाइतेसमेत हुन् ।
मुख्यमन्त्री प्रज्ज्वलदीप पदकबाट डाक्टर मोहिउद्दिन किदवाई र डाक्टर राजन पाण्डेलाई विभूषित गरिएको छ । डाक्टर किदवाईलाई नेपालमै अधिक जनताको शल्यक्रिया गरी जनस्वास्थ्यमा उल्लेख्य योगदान गरेको र पाण्डेलाई तराईका थारु समुदायमा समस्याको रुपमा रहेको सिकलसेल एनेमिया र थालेसिमियासम्बन्धी स्वास्थ्य समस्या पत्ता लगाई उक्त रोगको उपचारलाई प्रभावकारी बनाउने सम्बन्धमा अध्ययन अनुसन्धानमा सहयोग पुर्याएको भन्दै विभूषित गरिएको हो ।
प्रदेश स्थापना दिवसको अवसरमा प्रदर्शन गरिएको विभिन्न समुदायको झाँकीलाई समेत पुरस्कार दिइएको छ । पहिलो, दोस्रो, तेस्रो र सान्त्वना हुनेलाई नगद २५ हजार, २० हजार, १५ हजार र १० हजार रुपैयाँसहित प्रमाणपत्र प्रदान गरेर पुरस्कार प्रदान गरिएको हो ।
सो अवसरमा भूम्या झाँकी घोराही प्रथम भएको छ । नौमती बाजा नेपाल मगर सांस्कृतिक संघ राप्ती दोस्रो र वड्का नाच जागृति सांस्कृतिक राप्ती–७ तेस्रो भएको छ । झुम्रा नाच प्रस्तुत गर्ने शिव युवा क्लव लमही र नव प्रगतिशील युवा क्लव राप्ती सान्त्वना भएका छन् ।
बुधबार नै प्रदेशमा रहेका १० वटा मन्त्रालयको भवन निर्माणको शिलान्यास भएको छ ।
