गोपाल भण्डारी, साझा न्यूज
कपिलवस्तु, १० अषाढ । सरकारले हालै ८ देशका लागि राजदुत सिफारिस गर्ने निर्णय गरिरहंदा कपिलवस्तु जिल्लाका अबु सुफियान खानलाई साउदी अरेवियाका लागि राजदुत सिफारिस गरेको छ ।
कपिलवस्तु जिल्ला मायादेवी गाउंपालिका वडा नं. २ भैसकुण्डाका अबु सुफियान खान राजदुतका लागि सिफारिस भए संगै कपिलवस्तु जिल्लाका दक्षिणी क्षेत्रका मुस्लिम तथा आम सर्वसाधारण खुशी भएका छन् ।
कपिलवस्तु जिल्लाबाट ठुलो संख्यामा साउदी अरेवियामा यहांका मुस्लिम तथा अन्य समुदायका सर्वसाधारणहरु वैदेशिक रोजगारमा छन् । वैदेशिक रोजगारीमा रहंदा उनीहरुका थुप्रै समस्याहरु हुने गरेका छन् ।
अब आफ्नै गाउं ठाउंका व्यक्ति राजदुत भए पछि उनीहरुलाई साउदी अरेवियामा जस्तै सुकै समस्या परे पनि सुनुवाई हुनेमा सवै जिल्लावासीहरु आशावादी बनेको मुस्लिम अगुवा तथा जनता समाजवादी पार्टीका जिल्ला संयोजक ईरफान खानले बताए ।
ईस्लाम धर्मावलम्वीहरुको पवित्र तिर्थ स्थल मक्का मदिना पनि साउदी अरेवियामा छ । कपिलवस्तु जिल्लाबाट नेपाल भरमै सवै भन्दा बढी व्यक्तिहरु हज यात्राका लागि साउदी अरेविया जाने गरेका छन् ।
हज यात्रीहरुलाई पनि अब सहज हुनेछ, जनता समाजवादी पार्टीका संयोजक खानले भने, “हज यात्राका क्रममा हज यात्रीहरुले धेरै दुख पाउने गरेका थिए, अबका दिनमा केही राहत होला ।”
राजदुतका लागि सिफारिस भएका खान कपिलवस्तु घर भई काठमाण्डौंका व्यवसायी हुन् । अशोक राई नेतृत्वको जनता समाजवादी पार्टीको सिफारिसमा वर्तमान सरकारले उनलाई राजदुत नियुक्तिका लागि सिफारिस गरेको हो ।
मन्त्री परिषदको वैठकले साउदी अरेविया संगै भारत, अमेरिका, बेलायत, दक्षिण कोरिया, डेनमार्क, मेलेसिया र स्पेनका लागि राजदुत नियुक्तिको सिफारिस गरेको थियो ।
साउदी अरेवियाका लागि राजदुत नियुक्तिका लागि सिफारिस भएका खानले साउदी अरेविया र नेपाल विचको सम्वन्ध थप सुमधुर बनाउंदै साउदी अरेवियामा रहेका नेपाली कामदारहरुको अवस्था सुधारका लागि काम गर्ने बताए ।
नया रोजगारीका अवसरहरुको खोजी गर्दै थप रोजगारीका अवसरहरु सृजना गर्नमा समेत आफु सक्रिय भएर काम गर्ने उनले बताए ।
