नेपाल प्रिमियर लिग (एनपीएल) क्रिकेटमा लुम्बिनी लायन्सले पोखरा एभेन्चर्ससामु १७१ रनको लक्ष्य प्रस्तुत गरेको छ ।
कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको लुम्बिनीले निर्धारित ओभरमा ५ विकेट गुमाएर १७० रनको योगफल तयार पारेको हो ।
उसका लागि क्याप्टेन रोहित पौडेलले कप्तानी पारी खेले । ओपनरद्वय आषुतोश घुरैया र उन्मुक्त चन्द शुन्य रनमा आउट भएपछि धरमराएको लुम्बिनीको इनिङ्स रोहितले सम्हालेका हुन् । उनले ९५ रन जोडे । ५९ बलको सामना गर्दै ४ छक्का र १० चौका प्रहार गरेका रोहितको यो जारी एनपीएलमा पहिलो अर्धसतक हो । उनी सतक बनाउनबाट मात्र ५ रनले चुके ।
लुम्बिनीको ४६ रनमा ३ विकेट गुमाएको स्थिति सम्हाल्दै रोहितले टम मुर्ससँग चौथो विकेटका लागि ११० रनको साझेदारी गरे । मुर्स ४५ रनमा आउट भए । सन्दीप जोराले १८ रन बनाए ।
विपिन खत्रीले २ र म्याट क्रिच्लीले एक विकेट झारे ।
दुवै टोली पहिलो अंकको खोजीमा छन् । आफ्नो पहिलो खेलमा लुम्बिनी विराटनगर किङ्ससँग २ विकेटले पराजित भएको थियो । कुशल भुर्तेलको कप्तानीमा रहेको पोखरा भने यसअघिका दुवै खेलमा पराजित भएको थियो। पहिलो खेलमा चितवन राइनोजसँग ८७ रनले पराजित पोखरा दोस्रो खेलमा जनकपुर बोल्ट्ससँग ७ विकेटले हारेको थियो।
