उपाध्यक्ष चौधरी ज्यान मार्ने उद्दोगमा पक्राउ

तौलिहवा(कपिलबस्तु), चैत २४ गते । कपिलबस्तु प्रहरीले ज्यान मार्ने उद्दोग कसूरमा एक जना गाउँपालिका उपाध्यक्ष पक्राउ गरेको छ । खसशस्त्र प्रहरी बल बीओपी हथिहवामा कार्यरत सशस्त्र प्रहरी वरिष्ठ हवल्दार भिमबहादुर चौधरी सहितको टोली शिवालव बोर्डर चेकपोस्टमा नियमित ड्युटीमा खटिएको अवस्थामा चेकजाँचका क्रममा विवाद भएको प्रहरीले जनाएको छ ।
भारतबाट मोटरसाइकलमा सामान ल्याउँदै गरेका एक व्यक्तिलाई चेकजाँच गर्ने क्रममा ती व्यक्तिले आफू “लालाको मान्छे” भएको र लालासँग फोनमा कुरा गर्न आग्रह गरेका थिए । तर ड्युटीमा रहेका प्रहरीले अस्वीकार गरेपछि स्थिति तनावपूर्ण बनेको थियो ।
केही समयपछि शुद्धोधन गाउँपालिका ५ निवासी तथा गाउँपालिकाका उपाध्यक्ष लाला भन्ने होम प्रकाश चौधरी सरकारी गाडीमा चेकपोस्टमा पुगेर ड्युटीमा रहेका प्रहरीमाथि आक्रमण गरेको आरोप छ । उहाँले सशस्त्र प्रहरी सहायक हवल्दारसँग रहेको बन्दुक खोस्ने प्रयास गर्नुका साथै प्रहरीको पोशाक च्यातेर शरीरका विभिन्न भागमा कुटपिट गरी घाइते बनाएको प्रहरी नायब उपरिक्षक रिपेन्द्र कुमार सिंहले बताउनुभयो ।
घटनापछि इलाका प्रहरी कार्यालय पकडीबाट खटिएको प्रहरी टोलीले चौधरीलाई सोही दिन पक्राउ गरेको उहाँको भनाई छ । उनीमाथि ज्यान मार्ने उद्दोग कसूरमा अनुसन्धान भइरहेको प्रहरी नायब उपरिक्षक सिंहले बताउनुभयो ।
जिल्ला अदालत कपिलवस्तुले चौधरीमाथि अनुसन्धानका लागि चार दिनको म्याद दिएको छ । प्रहरी नायब उपरीक्षक सिंहका अनुसार घटनाबारे थप अनुसन्धान भइरहेको र कानुन अनुसार कारबाही प्रक्रिया अगाडि बढाइएको बताउनुभयो ।