कपिलवस्तु, वैशाख १ । कपिलवस्तुको तौलिहवामा डा. भीमराव अम्बेडकर को १३५औँ जन्मजयन्ती भव्यताका साथ मनाइएको छ। बुद्ध विहार संघ कपिलवस्तुको आयोजनामा कार्यक्रम सम्पन्न भएको हो।
समारोहमा विभिन्न समुदायका प्रतिनिधि, समाजसेवी, विद्यार्थी तथा बुद्ध धर्मावलम्बीहरूको उल्लेखनीय उपस्थिति रहेको थियो। कार्यक्रममा डा. अम्बेडकरको योगदान, विशेषगरी दलित अधिकार, सामाजिक न्याय तथा समावेशी समाज निर्माणमा उहाँले पुर्याउनुभएको भूमिकाबारे चर्चा गरिएको थियो।
कार्यक्रममा कपिलवस्तुका प्रतिनिधि सभा सदस्य विक्रम सिंह थापा ले अम्बेडकरले देखाउनुभएको समानता र न्यायको मार्ग आजको समाजका लागि अझ सान्दर्भिक रहेको बताउनुभयो। उहाँले सबै नागरिकलाई समान अवसर र अधिकार सुनिश्चित गर्न राज्य र समाज दुवै पक्षबाट निरन्तर प्रयास आवश्यक रहेको उल्लेख गर्नुभयो।
बुद्ध विहार संघका अध्यक्ष राज कुमार यादव ले अम्बेडकरले देखाएको मार्गमा हिँड्न सबैलाई आग्रह गर्दै सामाजिक समानताको सन्देश अझ व्यापक रूपमा फैलाउनुपर्ने आवश्यकता औँल्याउनुभयो।
कार्यक्रममा सांस्कृतिक प्रस्तुति, विचार गोष्ठी तथा पुष्पाञ्जली अर्पण जस्ता विविध कार्यक्रम समावेश गरिएको थियो। अम्बेडकरको जीवनीबारे राम शरण रैदास ले प्रकाश पार्नुभएको थियो भने स्वागत मन्तव्य विन्दावासिनी हरिजन ले व्यक्त गर्नुभएको थियो।
कार्यक्रममा इन्द्र प्रसाद हरिजन, गोविन्द धवल, संजय पासी, शैलेन्दर हरिजन लगायतको सहभागिता रहेको थियो।
