भोगचलन गर्दै आए पनि दशकौंदेखि लालपुर्जाविहीन ८ हजार ३ सय ९६ गाउँ ब्लक पीडित परिवारले लालपुर्जा पाएका छन्। २०२१ सालमा भएको नापीको क्रममा जग्गाहरू गाउँ ब्लकका रूपमा छाडिँदा ती परिवारहरू लालपुर्जा पाउनबाट वञ्चित रहँदै आएका थिए। गाउँ ब्लकको २०६०, २०६५ र २०७२ सालमा नापी भए पनि उनीहरूले ३ वर्षभित्र सो लालपुर्जा पाएका हुन्।
कपिलवस्तुमा २ वर्षभित्र ८ हजार ३ सय ९६ जना गाउँ ब्लक पीडितलाई लालपुर्जा वितरण गरिएको नापी कार्यालय कपिलवस्तुका प्रमुख जनक बहादुर भण्डारीले बताए। जिल्लामा साविक ८१ गाविसमा रहेको गाउँ ब्लकको नाप-नक्सा कार्य सम्पन्न भएर लालपुर्जा वितरण कार्य अघि बढाइएको भण्डारीले बताए। २०२६ सालमा नापी भएपछि बल्ल लालपुर्जा पाउन सफल भएको उनले बताए। २०७२ सालमा गाउँ ब्लकको पुनः नापी भएको थियो।
२०२६ सालमा नापी हुँदा एकैपटक नापी गर्न गाह्रो भएपछि एउटै कित्तामा छाडिएको जग्गालाई गाउँ ब्लकका रूपमा राखिएको थियो। नापी कार्यालयका प्रमुख जनक बहादुर भण्डारीले जिल्लाको गाउँ ब्लक जग्गाको समस्या समाधान गर्न ५ वटा टोली परिचालन गरिएको बताए। उनले २०६५ सालदेखि नै नापी गरी लालपुर्जा वितरणको काम जारी रहेको बताए।
यसैबीच कपिलवस्तुको बुद्धभूमि नगरपालिका वडा नम्बर १० का ७ सय १६ गाउँ ब्लक पीडितहरूलाई स्वास्थ्य चौकीमा आयोजित कार्यक्रममा लालपुर्जा बाँडिएको छ। मेयर केशव कुमार श्रेष्ठ, उपमेयर मीरा कुमारी थारु, वडा नम्बर १ का वडाध्यक्ष सुरज प्रताप राणा, वडा नम्बर १० का अध्यक्ष सन्दीप कुमार पाण्डेय लगायतको टोलीले लालपुर्जा हस्तान्तरण गरेका थिए।
जग्गाधनीको प्रमाणपत्र पाएपछि वर्षौंदेखि जोतभोग गर्दै आएका जग्गाधनीहरूले बल्ल आफूहरू जग्गाको मालिक भएको महसुस गरेका छन्। प्रमाणपत्र पाएपछि बल्ल जग्गाको मालिक भएको महसुस भएको लालपुर्जा पाएकाहरूले बताएका छन्।
आइतबार जग्गाधनीको प्रमाणपत्र पाएका सोही वडा मोतिनगरका ८० वर्षीय श्यामलाल केवटले आफ्नै जीवनकालमा लालपुर्जा पाएकोमा धेरै खुसी लागेको बताए। ‘अब बल्ल जग्गाको वास्तविक मालिक भएको अनुभूति भएको छ,’ उनले भने।
सो अवसरमा मेयर श्रेष्ठले लामो प्रयास र कठिनाइका बावजुद गाउँ ब्लक पीडितले लालपुर्जा पाउन सफल भएको बताए। उनले आफ्नो पालिकामा रहेको गाउँ ब्लक पीडितको समस्या समाधान हुने बताए। वडाध्यक्ष पाण्डेयले गाउँ ब्लक पीडितहरू लालपुर्जाविहीन हुँदा वडाको कामकाजमा समेत समस्या आउने गरेको बताए। अहिले पीडित परिवारले लालपुर्जा पाउँदा आफूलाई समेत सन्तुष्टि मिलेको उनले बताए।
कार्यक्रममा गाउँ ब्लक जग्गाको सफलतापूर्वक काम सम्पन्न गरेका ५ नम्बर नापी टोलीका सबै सदस्यहरूलाई सम्मानित समेत गरिएको थियो।
