कपिलवस्तुका यशोधरा गाउपालिका स्थित सुठौली भन्सारमा चालु आर्थिक बर्षको साढे नौ महिनामा बार्षिक लक्ष्य पार गरी एक अर्ब १७ करोड राजस्व संकलन गरेको छ ।
सुठौलीमा चालु आर्थिक बर्ष २०८२/०८३ को साउन देखि बैशाख दोश्रो साता मै बार्षिक लक्ष्य भन्दा बढी राजस्प संकलन भएको हो । चालु आर्थिक बर्षकालागि भन्सारमा १ अर्व १० करोड ५२ लाख ५२ हजार लक्ष्य तोकिएको छ । बैशाख दोश्रो साता भित्रै बार्षिक लक्ष्य पार भएको सुठौली भन्सार कार्यालयका प्रमुख किरन बिष्टले बताए ।
चालु आर्थिक बर्षको बैशाख २३ गते सम्म १ अर्ब १७ करोड राजस्व संकलन भई सकेको उनले बताए । बैशाख महिनाको २३ दिन मै ११ करोड बढी राजस्व संकलन भएको थियो । बैशाख महिनाकालागि ९ करोड ६६ लाख लक्ष्य तोकिएको छ । गत आर्थिक बर्ष २०८१/०८२ मा ८० करोड लक्ष्य तोकिएकोमा १ अर्ब ३ करोड ६६ लाख राजस्व उठेको थियो ।
चालु आर्थिक बर्षको साउन र भदौमा मात्र लक्ष्य अनुसार राजस्व संकलन भएको थिएन । त्यस यता असोज देखि बैशाख महिना भित्र लक्ष्य भन्दा बढी राजस्व संकलन भएको छ । सबै भन्दा बढी चैत महिनामा नौ करोड १९ लाख लक्ष्य तोकिएकोमा १६ करोड ५५ लाख राजस्व उठेको छ । असोज महिनामा ९ करोड १७ लाख तोकिएकोमा १३ करोड ६१ लाख उठेको थियो ।
मंसिरमा ९ करोड ३१ लाख लक्ष्यमा १२ करोड ६८ लाख,पुसमा ९ करोड ४७ लाख मध्ये १२ करोड ८२ लाख उठेको थियो । फागुनमा ८ करोड ७४ लाख लक्ष्य मध्ये १० करोड २१ लाख संकलन भएको थियो । साउनमा ९ करोड ११ लाख मध्ये ८ करोड ८८ लाख तथा भदौमा ९ करोड ५३ लाख मध्ये ९ करोड ४१ लाख रकम उठेको थियो ।
आयत, मुल्य अभिबृद्धि कर, अन्तशुल्क कृषि सुधार शुल्क अन्य शीर्षकमा राजस्व संकलन भएको हो । सुठौली भन्सार कार्यालयका प्रमुख बिष्टले यही रफ्तारमा राजस्व संकलन भए १ अर्ब ४० करोड बढी राजस्व संकलन हुने बताए । चामल गहु उनले फलफुल, कोईला, खरानी, खाद्यान्न, तरकारी र केही अन्य सामानहरु आयात भइरहेको बताए ।
सबैभन्दा बढि औधोगिक कच्चा पदार्थ, चामल, तरकारी फलफुल भित्रिने गरेको छ । प्लान्ट क्वारेन्टाईन कार्यालयले आईतावरका दिन चेकजाचको काम नगर्ने भएकाले केही असर गरेका बिष्टले बताए ।
