सर्लाही, वैशाख २८ गते । सर्लाहीको गोडैता नगरपालिका–६ बगदहस्थित चिनी मिल नजिक एक बेवारिसे पुरुषको शव फेला परेको छ ।
हुलाकी सडक किनारमा अन्दाजी ४० वर्षीय पुरुषको शव बरामद भएको हो । घटनास्थलमा पुगेका जिल्ला प्रहरी कार्यालय सर्लाही का प्रहरी निरीक्षक विशालबहादुर बुढाथोकी ले सडेर गन्ध फैलिरहेको अवस्थामा शव फेला परेको जानकारी दिनुभयो ।
आइतबार अपराह्न हुलाकी सडकछेउको जलकुम्भीको घारीमा बेवारिसे शव देखिएपछि प्रहरी चौकी गोडैतामा खबर गरिएको थियो । त्यसपछि जिल्ला प्रहरी कार्यालयबाट प्रहरी निरीक्षक बुढाथोकीको नेतृत्वमा गएको टोलीले घटनास्थलको प्रकृतिमुचुल्का गरी शव पोस्टमार्टमका लागि आइतबार राति प्रादेशिक अस्पताल मलङ्गवा पठाएको छ ।
घाम र पानीका कारण शव सडिसकेको तथा कपडामात्र चिनिने अवस्थामा रहेको प्रहरीले जनाएको छ । मृतकको परिचय खुलाउने र मृत्युको कारण पत्ता लगाउने प्रयास भइरहेको सरोज राई ले बताउनुभयो ।
