कपिलवस्तुमा राष्ट्रिय आर्थिक गणना तीब्र, ११ हजारभन्दा बढी प्रतिष्ठानको तथ्यांक संकलन

तौलिहवा(कपिलबस्तु), बैशाख ३१ गते । जिल्ला आर्थिक गणना कार्यालय कपिलवस्तुले राष्ट्रिय आर्थिक गणना २०८३ अन्तर्गत जिल्लाभर आर्थिक गतिविधिसँग सम्बन्धित तथ्यांक संकलन कार्यलाई तीब्रता दिएको छ ।
कार्यालयका आर्थिक गणना अधिकारी मनोहर हरिजनका अनुसार यहि वैशाख २ गतेदेखि असार ७ गतेसम्म सञ्चालन भईरहेको बताउनुभयो । गणना अन्तर्गत उद्योग, प्रतिष्ठान, पसल, कृषि, वन तथा माछापालन क्षेत्रका दर्ता भएका संस्थासहित खानी तथा उत्खनन, औद्योगिक उत्पादन लगायत १८ वटा औद्योगिक समूहको आर्थिक गणना भइरहेको उहाँले बताउनुभयो ।
वैशाख २ गतेदेखि वैशाख ३० गतेसम्म जिल्लामा ११ हजार ४ सय ५ वटा प्रतिष्ठानको कागजी माध्यमबाट तथा ४० वटा प्रतिष्ठानको ई–सेन्स प्रणाली मार्फत तथ्यांक संकलन गरिएको अधिकारी हरिजनले बताउनुभयो ।
आर्थिक गणना सम्पन्न गर्न जिल्लामा ८ जना सुपरिवेक्षक र ६३ जना गणक गरी कुल ७१ जना कर्मचारी परिचालन गरिएको कार्यालयले जनाएको छ । स्थानीय तहअनुसार कपिलवस्तु नगरपालिकामा ८ जना, महाराजगञ्ज नगरपालिकामा ४ जना, वाणगंगा नगरपालिकामा ११ जना, शिवराज नगरपालिकामा १२ जना, कृष्णनगर नगरपालिकामा ७ जना, बुद्धभूमि नगरपालिकामा ८ जना, यशोधरा गाउँपालिकामा २ जना, मायादेवी गाउँपालिकामा ५ जना, शुद्धोधन गाउँपालिकामा ३ जना तथा विजयनगर गाउँपालिकामा ३ जना गणक खटाइएको जनाइएको छ ।
कार्यालयले हालसम्म तथ्यांक उपलब्ध गराउने सम्पूर्ण व्यवसायी तथा प्रतिष्ठानप्रति आभार व्यक्त गर्दै बाँकी रहेका व्यवसाय तथा प्रतिष्ठानलाई सत्य र पूर्ण विवरण उपलब्ध गराउन आग्रह गरेको छ ।
आर्थिक गणना अधिकारी मनोहर हरिजनका अनुसार उपलब्ध गराइने सम्पूर्ण तथ्यांक केवल तथ्याङ्कीय प्रयोजनका लागि मात्र प्रयोग गरिने र तथ्याङ्क ऐन २०७९को दफा १० अनुसार पूर्ण रूपमा गोप्य राखिनेछ । जिल्लामा यसअघि २०७५ सालमा १३ हजार ६ सय ७ वटा प्रतिष्ठानको गणना गरिएको थियो ।