कपिलवस्तुमा धान रोपाइँको समय नजिकिँदै गर्दा किसानहरू धानको बिउ अभावको समस्याबाट पीडित बनेका छन्। जिल्लाका किसानको तर्फबाट समाजसेवी परमेश्वर पाठकले प्रमुख जिल्ला अधिकारी समक्ष ज्ञापनपत्र बुझाउँदै धानको बिउ सहज रूपमा उपलब्ध गराइदिन माग गरेका छन्।
ज्ञापनपत्रमा कपिलवस्तु जिल्लामा करिब ९५ प्रतिशत परिवार कृषि पेशामा निर्भर रहेको उल्लेख गर्दै अहिले धान खेतीको मुख्य समयमै किसानले बिउ नपाउँदा समस्या झेलिरहेको जनाइएको छ। किसानहरूले समयमा बिउ नपाउँदा उत्पादनमा असर पर्ने चिन्ता व्यक्त गरेका छन्।
“नेपाल कृषि प्रधान देश भए पनि किसानले पटक–पटक समस्या भोग्नुपरेको छ, तर सम्बन्धित निकायको ध्यान पुग्न सकेको छैन,” ज्ञापनपत्रमा उल्लेख गरिएको छ।
समाजसेवी परमेश्वर पाठकले किसानलाई सहज रूपमा धानको बिउ उपलब्ध गराउन प्रशासनले आवश्यक पहल गर्नुपर्ने माग गरेका छन्। उनले सम्पूर्ण किसानको तर्फबाट समस्या समाधानका लागि तत्काल पहल गरिदिन आग्रह गरेका छन्।
