कपिलवस्तु, भदौ ८ गते । जिल्लाको मायादेवी गाउँपालिका ५ सिहोरहवामा करिब १२ करोड रुपैयाँको लगानीमा ‘भारद्वाज तेल उद्योग’ सञ्चालनमा आएको छ । स्थानीय स्तरमै रोजगारी सिर्जना गर्न स्थापना गरिएको उद्योगले राइस ब्रान तेल उत्पादन सुरु गरेको हो ।
उद्योगका प्रबन्धक ओम शंकर उपाध्यायका अनुसार उद्योगमा हालसम्म करिब १२ करोड रुपैयाँ लगानी भइसकेको छ । उद्योगको क्षमता विस्तार र व्यवस्थापनका लागि आगामी दिनमा थप लगानी आवश्यक पर्ने उहाँले बताउनुभयो ।
वैदेशिक रोजगारीका क्रममा तीन वर्ष अष्ट्रेलियामा बसेर तेल उत्पादन सम्बन्धी अनुभव हासिल गरेका उपाध्यायले स्वदेशमै केही गर्न उद्योग स्थापना गरेको बताउनुभयो । स्थानीय स्रोत, श्रम र जनशक्तिलाई उपयोग गर्दै रोजगारीसँग जोड्ने उद्योगको मुख्य लक्ष्य रहेको उहाँको भनाई छ ।
उद्योग सञ्चालनमा आएपछि हाल करिब ८० जनाले प्रत्यक्ष रोजगारी पाएका छन् । उद्योगले उत्पादन तथा बिक्री वितरणसँग सम्बन्धित क्षेत्रमा थप रोजगारी सिर्जना हुने जनाएको छ ।
उपाध्यायका अनुसार नेपालमै राइस ब्रान तेल उत्पादन गर्ने उद्योगमध्ये भारद्वाज तेल उद्योग पहिलो मध्ये एक आधुनिक उद्योग रहेको दाबी गर्नु भएको छ । उद्योगले वार्षिक ४ हजार २ सयदेखि ४ हजार ५ सय मेट्रिक टनसम्म तेल उत्पादन गर्ने लक्ष्य लिएको छ ।
राइस ब्रान तेल मानव स्वास्थ्यका लागि उपयोगी खाने तेलमध्ये एक रहेको उहाँले बताउनुभयो । उद्योगबाट उत्पादित तेलमा भिटामिन ‘ए’ र ‘डी’ फोर्टिफाइड गरिएको जनाइएको छ । “मानव शरीरका लागि उपयोगी र गुणस्तरीय तेल उत्पादन गर्ने हाम्रो उद्देश्य हो,” उहाँले भन्नुभयो ।
उद्योगले हाल प्रति लिटर तेल ३६५ रुपैयाँमा बिक्री गरिरहेको छ । उद्घाटन तथा प्रवद्र्धनको अवधिमा एक लिटरको तेलमा ८ प्रतिशत र पाँच लिटरको तेलमा १२ प्रतिशत छुटको व्यवस्था गरिएको उद्योगले जनाएको छ ।
उपभोक्तालाई सहज र सस्तो रूपमा तेल उपलब्ध गराउन कपिलवस्तु जिल्लाभर निःशुल्क होम डेलिभरीको व्यवस्था गरिएको प्रबन्धक उपाध्यायले बताउनुभयो । निःशुल्क डेलिभरी सेवा मार्फत थप स्थानीयलाई अप्रत्यक्ष रूपमा रोजगारीसँग जोड्ने योजना रहेको उहाँले जानकारी दिनुभयो ।
मायादेवी गाउँपालिकाका अध्यक्ष वलीउद्दिन मुसलमानले यो उद्योगले पालिकाका नागरिकलाई रोजगारीको अवसर दिएको भन्दै उद्योगको प्रवद्र्धन र विकासका लागि गाउँपालिका सधैँ हातेमालो र सहयोग गर्न तयार रहेको प्रतिबद्धता जनाउनु भएको छ ।
