सामुदायिक वनको काठ लगत समर्थन तथा लिलाम सहमतिको सिफारिस गरिदिने प्रयोजनका लागि सेवाग्राहीसँग १५ हजार रुपैयाँ घुस लिएको आरोपमा वन अधिकृत भुवन पौडेलविरुद्ध भ्रष्टाचार मुद्दा दायर भएको छ।
अख्तियार दुरुपयोग अनुसन्धान आयोगले आइतबार डिभिजन वन कार्यालय, उदयपुरको योजना शाखाका प्रमुखसमेत रहेका वन अधिकृत (सातौँ) पौडेलविरुद्ध विशेष अदालत काठमाडौँमा आरोप पत्र दायर गरेको हो।
आयोगका अनुसार त्रियुगा नगरपालिका–१० स्थित डिभिजन वन कार्यालयमा कार्यरत पौडेलले सामुदायिक वन उपभोक्ता समितिको काठ लगत समर्थन तथा लिलाम सहमतिको सिफारिस पत्र उपलब्ध गराउन सेवाग्राहीसँग घुस मागेको उजुरी परेको थियो।
उजुरीका आधारमा आयोगको इटहरी कार्यालयबाट खटिएको टोलीले सेवाग्राहीबाट १५ हजार रुपैयाँ लिइसकेको अवस्थामा पौडेललाई नियन्त्रणमा लिएको थियो।
अनुसन्धानका क्रममा पौडेलले सिफारिस गरिदिएबापत घुस माग्दै सेवाग्राहीलाई दुःख-हैरानी दिएको, नियतवश काममा आलटाल गरेको र बदनियतपूर्वक रकम लिएको पुष्टि भएको आयोगको दाबी छ।
आयोगले पौडेलको उक्त कार्यलाई भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर ठहर गर्दै १५ हजार रुपैयाँ बिगो कायम गरेको छ। उनीविरुद्ध सोही ऐनको दफा ३ को उपदफा (१) को देहाय (क) बमोजिम कैद तथा बिगो बराबर जरिवानाको माग दाबी गरिएको आयोगले जनाएको छ।
