श्याम क्षेत्री, नागोया(जापान)
जापानको आइची–नागोयामा आयोजना भएको २०औँ एसियाली खेलकुदअन्तर्गत महिला भलिबलमा नेपाली राष्ट्रिय महिला टोलीले आज आयोजक जापानसँग प्रतिस्पर्धा गर्दैछ।
समूह ‘ए’ मा रहेको नेपालले प्रतियोगिताको पहिलो खेलमै बलियो जापानी टोलीको सामना गर्न लागेको हो। जापानी सञ्चारमाध्यमहरूले पनि आजको खेललाई जापान महिला भलिबल टोलीको एसियाली खेलकुद अभियानको सुरुवाती खेलका रूपमा उल्लेख गरेका छन्।
जापानी खेल सञ्चारमाध्यम GOAL Japan, TBS NEWS DIG लगायतले जापान र नेपालबीचको खेलको समय तथा प्रसारणसम्बन्धी जानकारी सार्वजनिक गरेका छन्।नेपालका लागि एसियाली खेलकुदमा जापानजस्तो अनुभवी टोलीसँग प्रतिस्पर्धा गर्नु महत्वपूर्ण अवसरका रूपमा हेरिएको छ। नेपाली टोलीले आफ्नो क्षमता प्रदर्शन गर्दै प्रतियोगितामा सुखद सुरुवात गर्ने लक्ष्य राखेको छ।
आजको खेल जापानमा साँझ ७:२० बजे र नेपालमा अपराह्न ४:०५ बजे सुरु हुने तालिका छ।
आइची–नागोया एसियाली खेलकुदको औपचारिक उद्घाटन सेप्टेम्बर १९ मा हुनेछ भने समापन अक्टोबर ४ मा हुने कार्यक्रम छ। महिला भलिबलका खेल भने उद्घाटन समारोहअघि नै सुरु हुने तालिकामा उल्लेख छ।
नेपाल र जापानबीचको यो खेलप्रति जापानमा रहेका नेपाली समुदाय तथा नेपालका भलिबल समर्थकहरूको समेत विशेष चासो देखिएको छ।
